Vijayawada, Rymphang:
U Myntri ka sorkar pdeng ba dei khmih ïa ka Petroleum and Natural Gas u Hardeep Singh Puri u la pynpaw ïa ka jingkyrshan jong ka sorkar kmie ïa ki projek pynroi jong ka jylla bad ong ba ki polisi ba thymmai jong ka US ki lah ban nym don jingktah ïa ka dor jong ka umphniang ha India bad ki lah ruh ban hiar shuh shuh ha ki ïew ki hat jong ka pyrthei.
Haba kren ha ki lad pathai khubor ha Vijayawada ha ki khyndiat sngi jong ka taïew ba la lah, u la pynpaw ïa ka jingkyrshan ïa ki karkhana pynkhuid umphniang, ka GAIL’s Srikakulam-Angul Natural Gas Pipeline, ka AIIMS Mangalagiri, ka IIT Tirupati, bad ka IISER Tirupati. Nalor kata, u la kdew ïa ka jingkiew kaba khraw ha ka jingmang pisa na ka bynta ki jingtei rel, na ka T.886 klur (2009-2014) sha ka T.9,417 klur (2024-25).
U Puri u la kdew ïa ki projek surok bad lynti rel kiba kongsan, ba kynthup ïa 4,741 km ki surok bah jong ka ri, ka Bengaluru-Kadapa-Vijayawada Expressway, bad ka jingpynthymmai ïa ki 73 tylli ki steshon rel hapoh ka Amrit Bharat Station Scheme. U la pynbna ïa kane ka NTPC Green Hydrogen Hub ha Pudimadaka bad ki lai tylli ki Greenfield Airport kiba thymmai.
Haba pynksan ïa ka jingshimkhia jong ka sorkar ba la ïalam da ka BJP na ka bynta ka roi ka par jong ka Andhra Pradesh, u la pynpaw ba hapoh ka jingïalam jong u Myntri Rangbahduh u Modi, ka India ka dang kiew kum ka ri kaba donbor ha ka liang ka ïoh ka kot ha ka pyrthei.
