Mawkyrwat, Rymphang 24
Ka Mawlangwir Sports Club ka la pynhap pyrda noh ïa ka lympung ïalehkai phutbol kaba heh duh ha ka thaiñ ba la tip kum ka 17th Mawlangwir Invitation Football Tournament 2024-25 ha madan Rowell Lyngdoh, Stadium, Saitsnad Mawlangwir South West Khasi Hills District ha ka Lah Sngi U Blei.
Ïa ka nam lahduh ha kane ka lympung la rah da ka Benris FC hadien ba ka la lah ban pynliem noh ïa ka Nongbri Brothers da 4-0 kol ha kane ka jingïakhun final.
Lyngba katei ka nam jop ka Benris FC ka la ïoh rah ïa ka khusnam song pisa kaba T.8 lak tyngka ryngkat ka trophy.
Haba phai sha ka jingïalehkai jong ka kylla step, ka Benris naduh ba sdang ka la lah ban ïalehkai bha bad ha ka minit kaba 24 ka la lah ban pynkhih jar nyngkong lyngba u Aiban Dohling.
Haba bteng ïa ka jingïalehkai, ka liang pyrshah ka la ïaleh katba lah ban pynphai ïa ka kol hynrei kam shym la lah bad haduh ba kut ka por ka la shah tam da 1-0 ha ka kylla step
Ha ka kylla miet, ka Benris ka ñion tyngeh biang bad da ka jingbit ki rangïalehkai shakhmat ka la ïoh biang ban pynkhih ïa ka kol ba ar lyngba u Jackson ha ka minit kaba 50 bad pynbud biang sa ka kol na u Aiban Dohling ha ka minit kaba 52 bad u Wick Bina ha ka minit kaba 66 bad lyngba kitei ki kol ka Benris ka la pynthikna ïalade kum ka lahduh ha katei ka lympung.
Ïa ka nam ‘Best player’ ha kane ka sngi la ïoh da u Chesterpaul Lyngdoh, Top Scorer, Carlos Chalam bad best Goal keeper ki dei na ka Benris FC.
Ïa kane ka lympung la wan ban pynhap pyrda da u Bah Forwardman Nongrem, General Secretary South West Khasi Hills District Sports Association ryngkat ka jingdonlang u Bah H.S Diengdoh, President, South West Khasi Hills District Sports Association, Bah S.K Budnah, President Mawlangwir SC Bah Benjohnson Lyngdoh, Secretary MSC bad kiwei kiwei ki ‘riew Rangbah.
