U Eklesiastis u khlem bakla

D. H. Kharkongor

Kat kum u Eklesiastis ba ka don ka aiom lane ka por ïa kiei kiei baroh. Namar kata ka por ïa ka jingthmu baroh lem bad ka kam baroh, kiba hapoh ka bneng. Te kumta ka por ban kha bad ruh ka por ban ïap. Ka por ban thung bad ka por ban rat pat noh ïa kata kaba la thung. Ka por ban pynpra noh ïa kaba la tei bad ka por ban tei thymmai pat ïa ka. Ka por ban rkhie bad ka por ban ïam. Ka por ban shad kmen bad ka por ban sngewsih. Wat ka por ban sngap beit jar bad ka por ban kren shai kdar. U Eklesiastis u khlem bakla, ha kaba ïadei bad ka por. U khlem bakla naba wat kane ka ‘result’ jong kane ka MDC Election – 2025 ruh ka pynshisha ba ka don ka aiom lane ka por ïa kiei kiei baroh. Kane ka ‘result’ ka jingpynshisha ïa ki katto ki katne ngut, ki kyrtong ba la ïa ïareng, ba ka lah dei ka por ïa kiba kin shu phai beit noh da ka lyngkdong ïa ka kam saiñ pyrthei ne ka ‘Politics’ ne ka kam saiñ hima -sima. Ka ‘aiom’ lane ka por ïa kiba kin nym phaidien biang sha ka kam saiñ pyrthei.

Ka don ka aiom lane ka por ïa kiei kiei baroh.Namar kata dei ban da bishar bniah shwa ïa ka aiom, ha shwa ban lur bad bet ïa u symbai. Kine ki kyrtong kiba lah rem ki lah dei ban ithuh shaikdar shwa ïa ki dak ki shin kiba batai kaba kumno kane ka ‘aiom’. Ki lah dei ban ithuh kaba kumno kane ka ‘lyer’ kaba dang ïaibeh haduh mynta mynne. Ki lah dei ban ithuh shai tang na ka jingdem ka jingnguh ka jong une u ‘khah’. Kumta ha kaba ïadei bad ki katto ki katne ngut ki ‘kyrtong’ ba nud ban ong ba kane ka kynti kaba mynta kam pat dei ka ‘aiom’ ïa ki ba kin bet beit noh syndon. Ynda haba kren shai kane mynta kam pat dei ka ‘aiom’ ïa kiba kin ïa mih madan ne ba kin ïa aireng. Ki bapli ki lah kum laplah, ki lah kum bakla jur. ñiuma, lada kiba kum kita ki kyrtong ki ïamih madan tang kum ka jingpynithuh ïalade, kata, ha ryngkat ka jingsngewthuh shaikdar ba ha kane ka kynti kaba mynta kin nym pat kynjoh sha ka ‘thong’ kaba ki don. Hynrei ym lah pat khlem da rymmuiñ ïa ka jingmih madan ka jong kito ki kyrtong kiba kylla long pynban tang kum ka daw bah jong ka ‘jingïa-wiat sammut’. Kiba wat u khyllung u khynnah ruh um lah khlem da sammut ïa ki. Kiba la kum tur laplah shata sha kaba wat ki ‘angel’ ruh ki shynrain wat tang ba kin peit ka khmat.

Ka don ka ‘aiom’ lane ka por ïa kiei kiei baroh. Kumta ngam artatien ba kane ka kynti kaba mynta ka dei ruh ka ‘aiom’ kaba khatduh ïa ki katto katne ngut ki ‘nongïarap pynpadiah’. Ki ‘King Maker’, kumba jer ba nam kyrpang ki katto ki katne ngut. Ki ‘King Maker’ kiba mlien ban kyntiap pat de shiphangshane bad shiphang shatai kumba kyntiap u ‘thyllah’. Ki ‘King Maker’ kiba ynda mynta wat u paidbah ruh u lah ithuhshai ïa ka jinglong kaba shisha ka jong ki. Kiba kat ban duh noh ïa ka jingshañiah ka jong uba bun balang. Ki ‘King Maker’ kiba dei pynban kawei na ki daw jong ka jingrem noh pynban u kyrtong uba ki ïarap ‘padiah’.

Ka don ka ‘aiom’ lane ka por ïa kiei kiei baroh. Ka la paw shaikdar ruh de ba uba bun balang um pat kloi ban pdiang ïa ka ‘Common Platform’. Ka ‘Common Platform’, kaba kham kyrpang, kam shym la lah ban khring ïa u paid, uba ka dei ban khring. Kiba poi sha ka ‘Common Platform’, kaba kham kyrpang, ki dei pynban tang ki ‘synran’ ki jong ki kyrtong kiba ïa aireng. Ki ‘synran’ kiba ïakneh ‘kyrshut tyrpeng’ bad la u jong u Kynrad. Ki ‘synran’ kiba ïa knieh ban ioh ïa ka hok katba kin ïa bam langsyndon hi ruh na ka juh ka ‘pliang Ksiar’ jong u Kynrad u jong ki. Ka ‘Common Platform’ kaba ‘fail’ ne kaba bakla jur wat ha kaba ïadei bad ka por, kata, ka por ne ka ‘kynta’ ba la khot pynlong ïa ka. Te hato donkam ba da pynshai ka dei ka ‘Common Platform’ ba la pynbeit kyrpang da mano?

Nangne sha khmat kan dei pat sa ka ‘aiom’ ba ki ‘balia siang sdieh’ kin hap ban kbum noh jak ïa la ka syntur. Ka ‘aiom’ jong ka jingpjah hi slam, kaba hadien ka jingkhluit than eh ka jong ki. Ka ‘aiom’ jong ka jingphetrieh kaba hadien kaba ki la kum leh ‘khmat shriew’. Ka ‘aiom’ jong ka jingïamrem kaba hadien ka jingkob pia. U Eklesiastis u khlem bakla mynba u ong ba ka don ka ‘aiom’ ne ka por ïa kiei kiei baroh. Ka por ba ki katto katne kin jah syndon noh jak, ka kyrteng ka jong ki, na ka ‘Saiñ Pyrthei’. Ka ‘por’ ïa ki ba kin shat jingmut lem noh sa sha ka kam ‘Nongsharai Shnong’ ne ‘Rangbah Shnong’, wei haba ki sngewthuh shai ba kim long eiei khlem ka ‘bor’. Te hato lah klem da ‘sammut’ ïa ki katto katne?