Bertina Lyngdoh
Mynta, ka dei sa ha phi,
Naba u paidbah u la kham shaniah ïa phi;
Ba phin ïeng ïa ka hok ka jingshisha,
Ba phin ym shu kular bad shetkylla.
Naba ki shaniah ki la ailad ïa phi,
Kumta, na kaba duna sha ka khyndiat;
Bad na ka khyndiat sha ka kham bun,
Bad kumne te phin nang ïai bun ha ka jingshakri jongphi.
ïa kaba la dep un ym phaidien shuh,
Naba mynta u la kham sngewthuh;
Ba jingkylla te ki kwah,
Ban bit ban biang ban bha lang baroh.
Na shane-shatai, lah ban sngew bad ïohi, ïa ki sur kynhoi ïa kiba ki la pynshong shuki. Mynta ka kynti, ka seng saiñ hima kaba ha ka dur u Prah ïa kaba la ngeit ba u long uta u ban pynkhuid ïa ka jaboh jabaiñ, ka la kham shah jied ban long kita ki ban kyrshan, ban ïarap, ban ïada bad trei ïa ka bha ka miat, ka hok u paidbah. U paidbah u donkam shisha ïa ki nongsynshar lane ki ban shakri da ka jingkhuid jingsuba. Dei namar kane, ka jingjied thymmai ïa ki ban shakri paitbah ka la nang kylla. Ka jubab u paidbah mynta ka kynti, ka pyni ba phin shu thiang tang ha ka ktien lada khlem ki kam u paidbah u lah ban jied hi ïa ka jingkylla. Ka jingbym shaniah shuh u paidbah ïa phi kumba u la shaniah ïa phi, lehse dei na kano-re-kano ka jingdkoh treikam, ha ka jingkhmih jingpeit jong phi.
Ka jingbakla kren ka lah ban long kawei na ki daw, ka jingsngew halor kaba shaba palat kum ki nongpeit nongkhmih ka lah ban long ruh kawei na ki daw, ka jingbym lah ban trei ïa ka bha ka miat jong uba bun balang, kane ruh ka lah ban long kawei na ki daw bad lehse bun sa da kiwei ruh ki daw. Kum ki paidbah, teng teng ngi kulmar ban jied kata hapdeng ka seng bad u nongïakhun. Teng-teng, ïa u nongïakhun ngi sngewtynnad eh hynrei ïa ka seng ba u don pat ngim sngewtynnad. Don ruh ba ïa ka seng ngi sngewtynnad eh katba ïa u nongïakhun pat ngim da sngewtynnad. Kane ka dei kaba pynkulmar ïa ki paidbah ha kaba bunsien ngim ju lah ban jied ïa ka jingkylla. Kumta, ka jubab kaba mynta ka kynti ka kdew ba u paidbah u la kham stad kham siañ ban jied ïa ki ban shakri ïa ka bha ka miat uba bun. To tip, ba man u briew u ïapher na uwei sha uwei pat, kumta ruh ka seng ka lah ban ïapher na kawei sha kawei pat. Namar kane, u paidbah hi u dei ban stad ha ka jingjied ïa ka jingkylla. Namarkata, kum ki nongjied, ngi kyrmen skhem ba phin trei hok ïa ka bha ka miat jong baroh lang kumba la shaniah ha phi. Lada ki paidbah ki ïohi ïa ki kam hok jongphi, khlem da ïeh shadien ïano ïano ruh, khlem pep phin nang ïai kiew ha ki jingshakri jong phi kiba kham shalor.
