New Delhi, Rymphang:
Ka kynhun Enforcement Directorate (ED) ka la pynlong ïa ka jingkhynra ha ki katto katne ki nongbah, kynthup ïa ka Delhi, Jaipur, bad Mumbai, hapoh ka aiñ pynïaid ïa ka pisa bar ri ka Foreign Exchange Management Act (FEMA) ha kaba ïadei bad ka mukotduma pynkylla pisa Cryptocurrency kaba T.600 klur. Haduh mynta, ki Bank Account kiba don T.2.18 klur tyngka kiba dei jong utei uba shah kynnoh, ki la shah khang lut.
Katkum ka jingong jong ki heh jong ka ED, ka jingtohkit ka la sdang hadien ba ka “khubor kotkhubor” ka la pynpaw ba uwei u nong India, u Chirag Tomar, u dang shah set phatok ha America, namar ba u la tuh palat ïa ka 20 Million Dollar na ki spah ngut ki lanot. U la pyndonkam da ki Website thok ne kiba la shna thok da kaba leh kum ka jaka die pisa Coinbase ban pynlong ïa katei ka kam thok. U la shah rai set phatok haduh 60 bnai ha ka ïingbishar jong ka US ha u bnai Risaw jong u snem ba la lah.
Ha ka jingtohkit, ka kynhun ED ka la lap ba ïa ki Website ba lah ban shaniah la thok da kaba pyndonkam ïa ki buit wad bniah. Kane ka la pynlong ïa ki Website thok ban paw ha khlieh duh jong ki jingwad bniah, kaba la pynlong ïa ki ban long kiba dei hok.
Ka Website thok ka la paw “kumjuh thik” bad kaba shisha, lait noh tang ki jingtip ba lah ban ïakynduh. “Haba ki nongpyndonkam ki pynrung ïa ki jingtip ba la buh thok, ka Website ba la thok kan pyni ba ka bakla bad kumta ki nongpyndonkam kin ïakynduh ïa u nombar ba la ai ha ka Website ba la thok kaba ha kaba kut kan pynïasoh ïa ki sha ka jaka phone ba la buh kyrpang ba la pynïaid da u Tomar,” la ong ki heh sorkar.
Shisien ba ki nongleh thok ki la ïoh rung sha ki Account jong ki lanot, ki la pynkylla ïa ki jingdon pisa jong ki sha ki Wallet kiba don hapoh ka jingpynïaid jong ki. Nangta la die ïa ka pisa Crypto ba la shah tuh ha ka Website Localbitcoins.com bad la pynkylla sha ka pisa India lyngba ki jaka pynkylla pisa jong ka India, katkum ka kaiphod jingtohkit jong ka kynhun ED.
Ki heh sorkar ki la pynpaw ba ïa ka pisa la “pynkynriah sha ki Bank jong u Tomar bad kiba haïing jong u.” Ka kynhun ED haduh mynta ka la ithuh ïa ka 15 klur tyngka kaba la ïoh da u Tomar bad ka ïing ka sem jong u lyngba kane ka skhim.
Ha kane ka jingkhynra, la khang ïa ki katto katne ki Bank Account kiba ïadei bad ka longïing u Tomar, kynthup ïa ki pisa ba la thep haduh T.2.18 klur. Ki heh sorkar ki la kynnoh ruh ba ïa ka rukom kaba kum kane ban die ïa ka pisa Crypto kaba artatien ha ki LocalBitcoins bad pynkylla sha ka pisa India lyngba ki jaka pynkylla pisa jong ka India la lap ha ka jingwad bniah.
