Lucknow, Rymphang:
U Abdullah Azam Khan, uba long u nongïalam ka Samajwadi Party, u la mih noh na ka patok Hardoi ha Uttar Pradesh, ha ka Sngi Ba-ar, hadien ba u la sah 17 bnai ha patok, ha kaba ki nongïalam bad ki nongkyrshan ka seng jong u ki la tuid shabar jong katei ka patok ban pdiang burom ïa u.
U Abdullah Khan u dei MLA barim na Suar konstitwensi ha Rampur bad khun jong u nongïalam ka seng SP barim uba la shah set patok bad u Myntri barim ka kynhun sorkar jylla u Azam Khan.
Katba u Abdullah Khan um shym la kren sha ki lad pathai khubor, u nongïasaid aiñ jong u, Satnam Singh Nattu, u la ïakren bad ki nongthoh khubor shabar jong ka patok Hardoi, da kaba ong, “Kumba ka ri baroh kawei ka tip, u Mohammad Azam Khan bad ka ïing ka sem jong u ki la shah pynshitom beiñ bad shah set patok. Mynta, ngi sngewnguh ïa U Blei, Allah, Waheguru na ka bynta ba ki la plielad na ka bynta ban phah pyllait sha ïing ïa u Abdullah.”
Katba ka khubor ba la jan pyllait noh ïa u, ka nang saphriang, ki nongkyrshan jong u, ki la sdang ban ïalum shabar jong ka patok, ryngkat bad ka MP jong ka Moradabad bad ka nongïalam jong ka SP, ka Ruchi Veera.
Ha kine ki snem, la ujor haduh 45 tylli ki mukotduma, kynthup ïa kawei kaba ïadei bad ka jingtuh ïa ki mashin, pyrshah ïa u Abdullah Azam Khan, bad u la ïoh jamin ha baroh kitei ki mukotduma. Ka jingpyllait ïa u ka la slem namar ki jingeh ha ka rukom treikam kaba ïadei bad ka jingpynshisha ïa ka jamin.
Ha ka Lah Sngi U Blei, ïa ka hukum pyllait na ka MP-MLA Magistrate Trial Court la phah sha patok Hardoi, kaba plie lad plie lynti ïa u ban shah pyllait.
Ka Veera, kaba la don lang ha Hardoi, ka la pynpaw biang ïa ka jingngeit jong ka ha ka rukom bishar. “Ngi la don ka jingshaniah ha ka tnad bishar mynshuwa, bad ngi dang don haduh mynta. La ai ïa ka hok, bad ngi sngewnguh. Wat la ka hukum jong ka ïingbishar ka la wan hynriew sngi shwa, hynrei ka la shim por ban pyndep ïa ki kot ki sla ban pyllait. Hynrei khatduh, ngi la ïoh ïa ka jingshai, bad ngi sngewkmen ba la ai ïa ka jingbishar bahok,” ka la ong.
