Chennai, Rymphang:
Ka jingïakhih ba khlem buh sngi jong ka kynhun ki nongtong dohkha kiba kyntait ban pyntreikam ïa ki 700 tylli ki jhad tong dohkha ba la pyndonkam da ki mashin, ka la sdang ha ka jaka pynhap dohkha kaba heh tam ha Tamil Nadu, ha Rameswaram, ha ka Lah Sngi U Blei.
Ka jingïakhih ba khlem buh sngi jong ki paid nongtong dohkha kiba kyntait ban pyntreikam ïa ki 700 tylli ki lieng kit dohkha ba la pyndonkam da ki mashin ka la sdang ha ka jaka pynhap dohkha kaba heh tam ha Tamil Nadu, Rameswaram, ha ka step jong ka Lah Sngi U Blei kaba la wanrah ïa ka jingduh khajna man ka sngi kaba la kot sha ka T.1 klur tyngka bad kaba la ktah ïa ka jingbha jingmiat jong ki longïing kiba palat ïa ka 10,000 tylli.
Shisngi hadien ba la kem 32 ngut ki nongtong dohkha bad la kurup ïa ki jhad jong ki da ki shipai duriaw jong ka Sri Lanka, ki jingïakhih kiba jur ki la ïai bteng ha kylleng ka jylla.
Ha kajuh ka por, u Myntri Rangbah ka jylla u MK Stalin u la ïakynduh ïa u Myntri ka tnat korbar ri u S Jaishankar da kaba pynpaw biang ïa ka jingkyrpad jong u kham mynshwa ban khot ïa ka Joint Working Group jong baroh ar tylli ki ri ban wad ïa ka lad kaba neh bad ban pynthikna ban pyllait noh ïa baroh ki nongtong dohkha kiba la shah kem bad ki lieng tong dohkha jong ki. Naduh u Kyllalyngkot mynta u snem, ki la don kumba 119 ngut ki nongtong dohkha bad 16 tylli ki lieng tong dohkha kiba la shah kem bad shah kurup ha ki shipai duriaw jong ka Sri Lanka ha ki 8 tylli ki jingjia ba la jia ha kylleng ki jaka, u Stalin u la pynkynmaw ha ka jingïakren jong u bad u Myntri ka sorkar pdeng.
Da kaba khot ïa ki jingjia kiba ju jia man ka por kum ka jingshah thombor ha ka synshar khadar jong ka India, u nongïalam ka PMK u Anbumani Ramadoss u la pynskhem ba ïa ka mat jong ki nongtong dohkha na Tamil Nadu kiba ïaid lait ïa u pud u sam jong ka duriaw dei ban ïohi kum ka jingeh kaba ïadei bad ka jinglong briew bad ka jingim, kumba la rai da ka kynhun treikam ba ïatreilang jong ka India bad ka Sri Lanka halor ka kam tong dohkha, kumba la rai da ka India-Sri Lanka Joint Working Group on Fisheries ha ka jingïalang ba la long ha ka 29 tarik, Risaw jong u snem ba la lah.
Ha ka por mynstep jong ka Sngi U Blei, ki shipai duriaw jong katei ka ri ba don ha dewlynnong, ki la kem ïa ki nongtong dohkha na Rameswaram bad ki sawdong sawkun jong ka. Ka la kurup ïa ki san tylli ki jhad tong dohkha kiba ki pyndonkam halor ka jingkynnoh ba ki la tong rhah ïa ki dohkha bad pynkheiñ ïa ki aiñ jong u pud u sam jong ka pyrthei ha shilynter ka Palk Straits.
Ki kynhun seng jong ki nongtong dohkha kiba la pynlong ïa ki jingïakhih ha kylleng ka rud duriaw jong ka Tamil Nadu ha ka Sngi U Blei bad Lah Sngi U Blei ki la sangeh noh ban trei lada ka sorkar pdeng kam lah ban weng ïa ki jingeh.
U P Jesuraja, uba long u President jong ka All India Mechanized Boats Fishermen Association, uba shong ba sah ha Rameswaram bad uba dei u trai jong kawei na ki san tylli ki jhad tong dohkha kiba la shah kurup ha ka Sngi U Blei, u la ong ba ka jingkiew jong ki nongtong dohkha kiba la shah kem ka long kaba sngewkhia namar ha u snem ba la lah la kem haduh 530 ngut ki nongtong dohkha na India, bad ki lieng tong dohkha kiba la shah kurup ki long 381 tylli.
U la kdew ruh ba ha ka jingïalang ha Delhi ha u Nohprah jong u snem ba la lah, ka President ka Sri Lanka ka Anura Kumara Dissanayake bad u Myntri Rangbahduh ka ri u Narendra Modi ki la mynjur ba ïa ka mat ba ïadei bad ki nongtong dohkh ha Palk Strait dei ban peit na ka jingïohi jong ka jinglongbriew.
Ka dkhot jong ka Lok Sabha na ka seng DMK ka Kanimozhi Karunanidhi ka la ong ba ka seng ka ïeng skhem bad ki kynhun jong ki nongtong dohkha ha Ramanathapuram, Pudukottai, Nagapattinam, Thirunelveli, bad Kanyakumari, kiba mynta ki buh ha tmier ïa la ka jong ka jingim lada ki kamai jakpoh na ka daw ka jingap jingma na ki shipai duriaw jong ka Sri Lanka.
U nongïalam jong ka kynhun ba dei khmih jong ki nongtong dohkha u R Sagayam u la ong ba yn sa thaw ïa ki buit hapoh ar sngi ban pynbor ïa ka sorkar pdeng bad ban wad ïa ka lad kaba neh.
Katkum ka jingong jong u, ki nongtrei ha ka kam tong dohkha dohkha ki sngewtieng ruh halor ka jingpynbna jong ki bor synshar jong ka Sri Lanka ba kin die lilam ïa ki 67 tylli ki lieng tong dohkha, kynthup ïa san tylli ki lieng ka ri bad 62 tylli ki lieng ba pyndonkam mashin, kiba la shah kurup ha ki shipai duriaw ha u snem 2024.
“Ka rai ba la shim da ka sorkar Sri Lanka ban die noh ïa ki mar ki mata jong ngi ka long kaba sngewsih bad ka bym lah ban long. Ha ka por ba ki nongtong dohkha na Tamil Nadu ki kyrpad ban ïoh ïa ki kam tong dohkha kiba ïoh jingïada bad kiba shngaiñ ha shilynter ka Palk Straits, ka jingsngap jar na ka sorkar pdeng ka dang long kaba pynkyndit. Ka hok jong ngi ban tong dohkha ha Palk Straits ka la don naduh mynbarim, bad ngin ym pyndem ïa ka”, la ong u Sagayam. “La kumno kumno, ka sorkar pdeng ka la ban pynsuk ïa ka jingïalang hapdeng ki nongmihkhmat jong ngi bad ki nongtong dohkha jong ka thaiñ Northern Province jong ka Sri Lanka ban pynduna ïa ki jingpyrshah jong ki. Dei ban burom ïa ka hok tynrai jong baroh arliang ryngkat bad ki jingïateh ba arliang mamla halor ka jingtong dohkha kaba shngaiñ”, la ong u Jesuraja.
