C. B. Iawphniaw
Ka kur jongno jongno ka la ïa khleh milai ka shongkha shongman. Ka kur ka long tang ban pynneh pynsah ïa ka kyrteng ka jait ka khong. Kano kano ka kur jongngi ki Khasi kam long shuh kaba dang long kyrpang khlem ïa khleh ha ka shongkha shongman. Balei nga ong, kumta namar nga shem na ka shongkha shongman ngi dei ban sngewthuh ïa ka longkur longjait. Shu buh ka Kmie jong ka ïing ka sem ka dei na ka jait “Dkhar” ka don ki khun kynthei san ngut.
Na kita ki khun kynthei, kaba nyngkong ka ïoh tnga ïa u mama China, kaba ar ka ïoh ïa u mama Nepali, kaba lai ka ïoh ïa u mama Naga, kaba saw ka ïoh ïa u Khasi na ka jait “B” bad kaba san ka ïoh ïa u Khasi na ka jait “K.” To baroh kine ki khun jong kine san ngut ki shim ïa ka jait jong ka kmie kaba dei ka jait “Dkhar.” Kane ka long katkum ka dustur ai jait sha ka kmie. Namarkata kane ka rukom ai jait kmie ruh kam long shuh kaba dang long kyrpang, namar la ïa khleh u symbai ki kpa bapher bapher, jong kine ki khun kynthei san ngut. Namarkata haba peit ïa kane ka rukom jong kano-kano ka kur ka long tang kum ka Uniform jong ki skul ba la phong ki khynnah skul na ki shnong bapher bapher, namar u symbai u la ïapher na ki tnga ba ïapher. Kumta ka jait ka kur jongngi ki Khasi kam long nylla kum ka kur wat lada ngi ïa ai jait sha ka kmie. Namar ki khun ki ïoh tnga ba ïapher ka snam bad u symbai.
Namarkata ka kur ka long tang kum ka Uniform. Kane ym dei ba nga kren beiñ ne ñiewbeiñ ïa kano-kano ka kur hynrei nga pynpaw ïa ka jingshem jong-nga ba la jan baroh ki kur ki la ïa khleh milai ka shongkha shongman ym tang para Khasi hynrei bad ki tnga bym dei na ka jaitbynriew Khasi ruh. Kumta ka shongkha shongman khleh khawlang ka pyntngit ïa ka ïing ka sem bad ïa ka imlang ka sahlang bad ka kur ka jait.
