Mumbai, Rymphang:
U Myntri ka tnad Transport jong ka Maharashtra, u Pratap Sarnaik, ha ka sngi Ba-ar, u la ong ba ki dang pyrkhat ban buh ïa ki bor pahara lane ki pulit ha ki bos kit briew jong ka jylla kiba leit sha ka jylla ba marjan jong ka Karnataka, hadien ka jingshah thombor jong ki nongtrei jong ka.
U Myntri khynnah jong ka tnat ki kam pohiing ka jylla Maharashtra u Yogesh Kadam u la ong ba ka dei wat ka sorkar Karnataka ban pynbiang ïa ka jingpahara ïa ki nongleit nongwan bad lada kim leh kumta ka sorkar jylla kan leh bad sdang hi.
Ka sorkar jylla, ka la hukum ban pynsangeh noh ïa ki bos jong ka Maharashtra State Road Transport Corporation sha Karnataka, ha ka sngi Saitjaiñ, hadien ka jingshah thombor jong kawei ka kali bad ïa u nongñiah jong ka ha Chitradurga, ha ka miet jong ka sngi Thohdieng, kaba la kynnoh ba ki nongthombor ki dei ki lehnoh kiba kyrshan ïa ka Kannada.
Ha kane kajuh ka sngi, la kynnoh ba uwei u konduktor jong ka bus jong ka Transport Corporation jong ka sorkar Karnataka, u la shah thombor ha Belagavi, kaba don ha khappud bad ka Maharashtra, namar ba um shym la jubab ïa kawei ka khynnah kynthei ha ka ktien Marathi.
Baroh ar tylli ki jingjia naduh katei ka por ki la pynjur ïa ka jingïakynduh jingeh ha ki jaka khappud jong ki ar tylli ki jylla.
Ka Belagavi ka don ïa ki Marathi kiba bun bha bad kawei ka bynta napdeng jong ki ka ju dawa ba ïa kane ka distrik khappud jong ka Karnataka dei ban pynïasoh lang bad ka Maharashtra, ïa kaba la pyrshah da ki nongïakhih ba kyrshan ïa ka Kannada.
“Ka Marathi ka dei ka jingsarong jong ngi bad ngi donkam ban peit ïa ka jingshngaiñ jong ki nongleit nongwan jong ngi,” la ong u Sarnaik ha ki lad phah khubor.
U la ban jur ruh ba ki nongleit nongwan kim dei ban mad jingeh namar ka jingpynsangeh ïa ki bos da baroh ar tylli ki jylla.
Ki heh ophisar jong ka tnad kit mar ki dang ïakren bad ki paralok jong ki na Karnataka ban pynbeit ïa kane ka jingeh, ong u Myntri.
“Kum u Myntri ka tnad Transport, nga hap ban pyrkhat ïa ka jingshngaiñ jong ki nongleit nongwan jong ngi. Lada don katto katne ki jingleh pyrshah ïa ka imlang-sahlang, te ngi donkam ban pyrkhat ban buh ïa ki bor pahara ne ki pulit ha ki bos jong ngi kiba la pynïaid da ka sorkar kiba leit sha Karnataka,” la ong u Sarnaik.
“Ka Marathi ka dei ka jingsarong jong ngi bad ngi donkam ban peit ïa ka jingshngaiñ jong ki nongleit nongwan jong ngi, bad ïa kane ka mat yn sa ïakren ha ka jingïalang jong ka kynhun Myntri ka jylla ruh,” u la ong.
U Myntri u la ong ba ka Maharashtra ka don ïa ka “jingsarong” bad kan ym shah lada ki briew jong ka jylla ba marjan ki thombor ïa “ki briew jong ngi”.
