Panaji, Lber:
U Pandurang Madkaikar, uba long u nongïalam ka Bharatiya Janata Party (BJP) u la kynnoh ba ka sorkar jong ka seng jong u ha Goa ka donkti “tang ha ki kam bamsap” bad u myntri u la pynbor ïa u ban siew pisa T.15-20 lak, kaba la pynlong ïa ka jingkhot tohkit na ka liang pyrshah.
“Kam don ei ei kaba khih. Ki shu bunkam tang ban kheiñ pisa. Baroh ki Myntri ki bunkam ban kheiñ pisa. Ym don eiei kaba jia ha Goa”, la ong u Madkaikar ha ka sngi Balang.
U Madkaikar, uba dei u nongïalam barim ka Congress uba la long myntri ha ka sorkar BJP naduh u snem 2017 haduh u snem 2019, u la ong ba khatduh u la ai pisa ïa u Myntri na ka bynta “ka kam kaba rit” katba u la kyntait ban pynpaw kyrteng ïano ïano ruh. “
U [u myntri] la shim ïa ka File jong nga kaba nga la pyntreikam na ka tnad…u la buh ha ïing bad u la iehnoh ïa ka khubor ba lada don kiba wan shim ïa kane ka File, ong ïa u ba un wan ïakynduh ïa u.”
U Madkaikar, u ïathuh ba u la phah ïa u Manager jong u, ba un leit ïakynduh ïa u Myntri, uba la ong ïa u, ba un leit ïakynduh ïa u nongïarap jong u.
“U nongïarap u la dawa T.15-20 lak. Ïa ka pisa la siew ha ka taïew ba la dep. Ka la long ka kam kaba man ka sngi.” U la ong ba un sa jer kyrteng ïa u Myntri ynda u la mih noh na ka seng.
U Madkaikar u la ong ba ka don ka jinglute kaba jur ha Goa. “Man uwei pa uwei u Myntri u bunkam ban kamai pisa; la ka long kumno-kumno ruh. Baroh ki Myntri. Ki briew ki ap ban phah noh ïa ki sha la ïing.”
U la ong ba ym duna ïa ka 50% ki nongthaw aiñ kin rem ha ka ilekshon ban wan.
U Madkaikar u la hiar shuki kum u Myntri ha u snem 2019 namar ki jingshem jingeh ha ka liang ka koit ka khiah.
Ka kurim jong u, ka la ïakhun ïa ka ilekshon sha ka ïingdorbar thawaiñ jong u snem 2022 na ka tiket jong ka BJP hynrei ka la shah rem ha u kyrtong ka Congress, u Rajesh Faldessai, uba la kylla ruh sha ka seng kaba bat ïa ka jingsynshar.
U Myntri ka tnad Transport,Mauvin Godinho, u la ther pyrshah ïa u Madkaikar, da kaba ong ba ki briew, kiba sah ha ki ïing ïit, kim dei ban kawang maw bad peit ïa kaei kaba la jia, ha ka por ba u long Myntri.
U Yuri Alemao, uba long nongïalam ka liang pyrshah jong ka seng Congress, u la ong ba u Madkaikar u dei uba la pawnam ha ka kam bamsap.
“Ngam kwah ban kren eiei halor ki jingmut jong u. Hynrei ki long kiba khia bha. Uei une u Myntri uba donkti ha kaba shim pisa tuh? U hap ban jer kyrteng nyngkong bad ujor ejahar sha ki pulit. Kane kam dei kaba thymmai ha ka BJP. Mynta baroh ki la tip ïa kane.”
U Alemao u la ong ba u Myntri Rangbah ka jylla u Pramod Sawant um lah shuh ban iehnoh ïa kane bad u hap ban pynmih ïa ka kyrwoh.
“Ka dei ka jingshah kynnoh kaba jur bha da u dkhot ba ïatreilang jong ka seng jong ki. Kiwei pat kiba dang bteng ban long Myntri ki la kynnoh ba ki don ka jingbamsap. Ïa kane ym dei ban kheiñ sting. Ïa kane ka jingkynnoh la hap ban bishar bniah bha. Donkam ban don ka jingtohkit.”
U nongïalam ka Goa Forward Party u Vijai Sardesai u la ong ba lada ki pulit ne ki Anti-Corruption Bureau kim leh eiei halor kane, ka mut ba ka sorkar ka kwah ban phah ïa ka khubor ba ka bamsap ka la long kaba thikna bad ym don mano mano ruh ki ban lait, wat ki nongthaw aiñ barim ruh.
U Sardesai u la ong ba ki jingpyrshang ki dang ïaid ban pynsngap jar ïa u Madkaikar. “Ngi la ju kren ïa kane. Ban pynsngap jar ïa ki nongpyrshah bad ban bteng ïa ka jinglute ka dei ka Mantra jong ka BJP…Kim tieng wat ïa U Blei ruh.”
