Hyderabad, Lber:
Ki heh ophisar ki la pynsted ïa ki kam pynlait im ha ka lynti krem jong ka Srisailam Left Bank Canal (SLBC) da kaba pyntreikam da ka Hydraulic-Powered Robot kaba treikam hi. Kane ka jia hadien shisngi ba ki bor synshar ki la pyndonkam ïa ki robot kiba don ïa ki camera ba pyndonkam da ka AI ha ka jingpyntreikam.
U Special Chief Secretary jong ka Disaster Management u Arvind Kumar bad u Collector ka Nagarkurnool u B Santhosh ki la bishar bniah ïa ka jingïaid ki jingpyrshang ha ka sngi Balang.
Kane ka robot, kaba la shna ban rung sha ki bynta ba shapoh jong ka thliew, ki bym lah ban poi da ki kynhun pynlait im, ka kham tbit 15 shah ban ïa u briew, la ong ki heh sorkar. Kane ka robot kaba pyndonkam da ka bor Hydraulic, kaba la pyndap da ka motor kaba 40 HP, ka lah ban tan ïa ka sboh kaba 5,000 Cubic Metre ha ka shi kynta. La khmih lynti ba kan ïarap ban weng ïa ki jingeh kiba kongsan kum ka jinglum lang ïa ki sboh, ka jingrung um bad ka jingduna jong ka Oxygen.
Ka jingpyndonkam ïa kane ka robot ka bud hadien ki jingeh ba ki kynhun pynlait im ki ïakynduh, kynthup ïa ki jinglong jingman kiba shyrkhei kiba la khanglad ïa ki jingtreikam da ka kti. Ki nongmihkhmat na ka Anvi Robotics, u Vijay bad u Akshy, ki la leit jngoh ïa katei ka jaka lyngba ka rel Loco ha ka sngi Balang ban peit ïa ka jingtreikam jong kane ka robot.
Mynta, 12 tylli ki kynhun pyllait im na ka sorkar jylla bad sorkar pdeng ki dang trei baroh shisngi ha katei ka jaka, la kyrshan da ki tiar ba kongsan kum ki tiar sumar, ka lyer oxygen bad ki tiar donkam ha katei ka jaka. Ki heh sorkar ki la pynthikna ba baroh ki jingtei kiba donkam ki dang don ha ka jaka jong ki ban pynneh pynsah ïa ki jingtreikam.
Ïa ka metiap jong u Gurpreet Singh, uba dei u nongbylla uba la khlad noh ha katei ka jingjia, la pynphai noh sha ka shnong trai jong u ha Punjab bad la aiti noh sha ka kurim jong u, ka Rajvinder Kaur. Ka sorkar jylla ka la ai jingïarap da T. 25 lak sha ka longïing jong u Singh, la ong u Santhosh.
