Lucknow, Lber:
U Myntri Rangbah ka Uttar Pradesh, u Yogi Adityanath, ha ka sngi Balang, u la kyntu ban tehlakam ha kaba ïadei bad ki kor pynsawa ba la buh ha ki jaka mane blei bapher bapher.
Haba bishar bniah ïa ki kam pynroi bad ka suk ka saiñ ha Circuit House, u la bthah ruh ïa ki heh sorkar ba kin khang tyngeh ïa ki DJ kiba pynsawa jur ha ka por rakhe ïa ka Holi, ong ka kyrwoh khubor.
U Adityanath u la bthah ïa ki heh sorkar ban buh ïa ki CCTV ha ki jaka ba kongsan, kum ki bank, ki jaka ai pisa, ki dukan, bad ki jaka khaïi.
U la hukum ban buddien bha ïa ka jingkhaïi tuh ïa ki masi, maham ban leh tyngeh pyrshah ïa ki nongkhaïi tuh, ki trai kali, bad kino-kino ki pulit kiba donkti.
La bthah ïa u ADG Zone Piyush Mordia ban pynlong ïa ki jingbishar bniah katkum ki distrik khnang ban pynthikna bad ban pyntreikam hok ïa ka hukum khang pyrshah pura jong ka jylla ïa ka jingkhaïi tuh ïa ki masi.
“U Adityanath u la pynleit jingmut ruh ha kaba pynsted ïa ki projek pynroi, da kaba maham pyrshah ïa ka jingpynslem bad bthah ïa ki heh sorkar ban thung ïa ki ophisar Nodal na ka bynta kawei-pa-kawei ka projek kaba dang shna, ban pynlong ïa ki jingpeit bniah man ka taïew, bad ban aiti ïa ki kaiphot ïa ka jingïaid shaphrang. Hadien ba u la ïohi ïa ka jingpynslem ha ki katto katne ki projek, u la hukum ïa ki heh sorkar ban pynsted ïa ka kam katba u dang pynthikna ïa ka jingbha jong ka sorkar.
Da ka jingwan jong ka aïom Lyiur, u la bthah ïa ki heh sorkar ban pynthikna ïa ka jingpynbiang um kaba khlem jingthut, la bynrap ka kyrwoh khubor.U la tyrwa ruh ban pynitynnad ïa ki païa jong ki lynti suiñ da ki jingdro ba itynnad bad ki jingpynbna kiba bha.
U Mr Adityanath u la bthah ïa ki heh sorkar ban thaw ïa ki jaka die marbam kiba biang ha ka nongbah na ka bynta ki nongdie marbam ha surok.
U Adityanath u la bthah ruh ïa ki heh sorkar ban pynthikna ïa ka jingbam ba la ban thied ha ka dor ba biang, ka um dih kaba khlem jingsiew, bad ka jingpynbeit ïa ki jaka shong kiba biang na ka bynta ki nongrep ha baroh ki jaka thied kew.
U District Magistrate u la ong ba ka dor jong u kew ka la long T. 2,425 shi Quintal ka ban sdang ha ka 17 tarik, Lber ha kylleng ki 36 tylli ki jaka kiba don ha ka distrik, la ong ka jingthoh.
U Adityanath u la bthah ban buh ïa ki Hostel bad ki Canteen kiba remdor na ka bynta ki kynthei kiba trei ha ka distrik, la ong ka khubor.U la khot ïa ka jingpeitngor kaba pyrkhing bha ha ka por ba rakhe ïa ka ‘Holika Dahan’ bad ka Holi.
U la bthah ruh ïa ki heh sorkar ban ithuh ïa ki shiphew ngut ki nongleh kam sniew kiba pawnam na kawei pa kawei ka thanat pulit.
