Itanagar, Lber:
President ka NCP (SP) u Sharad Pawar ha ka sngi Saitjain u la pynpaw ïa ka jingsngewkhia halor ka jingpynïap ïalade jong ki nongrep ha Marathwada bad Vidarbha bad u la ong ba ka sorkar pdeng ka dei ban wanrah ïa ka rukom pyntreikam ban ïarap ïa ki nongrep.
Kane ka jingkren jong u Pawar ka wan ha ka por ba don ka jingpyntip ba la ai da ka tnad ai jingïarap bad pynbha jong ka jylla kaba la pynpaw ba ki don 2,635 ngut ki nongrep kiba la ïap na ka jingpynïap ïalade ha Maharashtra ha u snem 2024.
“Ki jingtip kiba la wan na Marathwada bad Vidarbha ki long kiba sngewkhia. Ngin sa lum ïa ki jingtip kiba thikna na ki jaka bapher bapher. Ka sorkar pdeng ka dei ban pynkhreh ïa ka jingpyntreikam ban ïarap ïa ki nongrep,” u la ong haba kren sha ki nongthoh khubor ha Baramati.
Halor ki jingkynnoh ba u Jayant Patil u nongïalam ka NCP (SP) un ïaid lait sha ka kynhun jong ka seng ba la ïalam da u Ajit Pawar, une u riew saiñ pyrthei uba la rangbah u la ong ba u Patil u la dep ban ai ïa ka jingkren jong u sha ki lad pathai khubor.
U Patil, u President jong ka NCP (SP) ha ka jylla, u la ong kham mynshwa ba ym don eiei kaba thikna shaphang jong u, kaba la pynmih ïa ka jingkynthoh ba u lah ban mih noh na ka seng.
Ha ka sngi Thohdieng, u Patil u la ïakynduh ïa u heh ka NCP (SP) ha kawei ka jingïalang ha Baramati bad hadien u la ong ba um shym la sngewsih bad la shim ïa ka jingmut kaba bakla na ka jingkren jong u.
“Ïa ka teknoloji AI lah ban pyndonkam ban kyntiew ïa ka jinglong jong u pai. Bun ki karkhana shini kin ïashim bynta ha ka rukom rep AI. La buh por ïa ka jingïalang hadien habud ha ka sngi bad ki katto katne ki heh jong ki karkhana shini. Ka rai kaba thymmai kan sa shim shen, bad ka jingpyndonkam ïa ka AI ha ka rep kan sdang noh shen,” u la ong.
U Pawar u la ong shuh shuh ba ka Beed, kaba la mih ha ki khubor namar ka jingshah pynïap jong u SarpanchSantosh Deshmukh, shisien ka dei ka distrik kaba shongsuk-shongsaiñ.
“Ka jinglong jingman ha Beed kam ju long kumne. Ka la long shisien ka distrik kaba suk. Kat haduh hynriew ngut ki briew na ka seng jong nga ki la shah jied na Beed. Hynrei don napdeng jong ki kiba pyndonkam bakla ïa ka bor jong ki, bad ngi dang sakhi ïa ka jingma kaba mih na kata,” u la ong.
