Hyderabad, Lber:
U Myntri Rangbah ka Telangana, u A Revanth Reddy, u la kynthoh jur ïa u K Chandrasekhar Rao (KCR) uba la wan mynshwa ha ka bor synshar kum u Myntri Rangbah ka jylla, ha ka por ba u ai jingkren ha ïingdorbar thawaiñ ka jylla Telangana.
U Myntri Rangbah ka jylla u la kynnoh ba u KCR u mad ïa ki jingbyrngem napoh ka longïing jong u hi, ym na kiwei pat ki kynhun ne ki briew ba nabar, kaba la pynlong ïa u Myntri Rangbah barim ban rai ban im hapoh ka jingpahara kaba jur jong ki pulit bad ban pynjngai ïalade na ki bahaïing.
U Myntri Rangbah ka jylla u la kren ïa kine ha ka jubab jong u ïa ka Motion jong ka jingai khublei ïa ka jingkren jong u Lat ka jylla. U Revanth Reddy u la kynthoh ruh ïa u KCR halor ka jingbym wan jong u ha ki jingïalang ha ïingdorbar thaw aiñ.
U la kdew ba u KCR, uba long mynta u nongïalam ka liang pyrshah, u la wan sha ka jingïalang tang arsien ha kine khatsan bnai ba la dep, wat la u la shim ïa ka tulop kaba T.57,84,144 shisnem.
Ka jingkren jong u Reddy ka long kum ka jingkynnoh ba la pynpaw da ki liang pyrshah. U la pynpaw ba un jin da la jubab ïa kino-kino ki jingeh ba la pynpaw da u KCR lada u Myntri Rangbah barim u la don ha ka dorbar, kaba pynpaw ba ka jingbym don jong u ka pynpaw sniew ïa ka jingaiti jong u ha ki kam thaw aiñ.
