Chennai, Lber:
Kiba bun na ki nongïalam jong ka seng BJP ha Tamil Nadu ba kynthup ïa u President jong ka seng ha ka jylla, u K Annamalai bad ka heh nongïalam jong ka seng ki kynthei, ka Vanathi Srinivasan, ki la shah kem ha ka Lah Sngi U Blei ha ki pulit ha shwa ban pynlong ïa ka jingïakhih jong ka seng pyrshah ïa ki jingkynnoh ba ki la don ki jingpyndkoh treikam ha ka TASMAC, kaba la pynïaid da ka sorkar.
Ka seng BJP ka la pynbna ïa ka jingïakhih jong ka tnad treikam jong ka TASMAC halor ka jingkynnoh ba ka la kot sha ka 1,000 klur tyngka ka jingpyndkoh treikam, kumba la kam da ka Enforcement Directorate dang shen.
U Annamalai u la ther tyngeh ïa ka DMK kaba synshar bad ïa u President jong ka seng bad u Myntri Rangbah ka jylla M K Stalin, da kaba kynnoh ba ka “shap jong ka pisa bad ka drama mang tyngka” ka dei ka jingpyrshang ban pynphai ïa ka jingpyrkhat na ki jingkhynra jong ka kynhun ED dang shen ha Tamil Nadu State Marketing Corporation (TASMAC), nalor kiwei pat ki jaka.
Ha ka jingthoh ha ka Social Media, une u heh nongïalam jong ka seng BJP ha ka jylla u la kynnoh ba ki heh nongïalam jong ka seng kynthup ïa u Tamilisai Soundararajan ki la shah set “hapoh ka ïingsah” ha ki pulit.
La kem ïa ki heh nongïalam jong ka BJP ba kynthup ïa u H Raja, u heh ka BJP Mahila Morcha bad u MLA ka Coinbatore South u Vanathi Srinivasan, u nongthaw aiñ ka Modakurichi ka seng u Dr C Saraswathi bad ki nongbud ka seng kiba kynthup ïa u Vinoj P Selvam bad u Amar Prasad Reddy.
U Annamalai u la ong ba ki la don ki “jingleh bym hok haduh T.1000 klur tyngka,” ha ka tnat pynïaid iew jong ka jylla Tamil Nadu (TASMAC) bad u la pynskhem ba ka seng kan dang ïai bteng ban ïakhih halor kane ka kam.
Haba kynthoh pyrshah ïa u CM Stalin, u Annamalai u la ong ba ka dei ka ‘jingkheiñ’ jong u ba u nongïalam ka DMK u ‘tieng’ ïa kaei kaei bad kumta u ‘pyrkhing’ ïa ka sur jong ka BJP.
“Nga kynnoh ba ka drama halor ka shap jong ki, ka drama mang tyngka baroh ki dei kiba la thmu ban pynkylla ïa ka jingpyrkhat na ki jingkhynra jong ka ED,” u la ong shaphang ka sorkar DMK kaba la pynkylla ïa ka dak jong ka pisa India da ka kyntien Tamil ‘Ru,’ kum ka dak jong ka mang tyngka dang shen.
U Annamalai u la ong ha ki nongthoh khubor ba watla ka ED ka la kheiñ ïa ki jingbymhok ba la kynnoh ha ka TASMAC haduh T.1,000 klur, hynrei u kheiñ ba kan long “T.40,000 klur.”
“Kane ka pisa kaba T. 1000 klur ka dei ka tduh jong u lum thah. Kane ka jingïakhih kan ym pynkhih tang ïa ka saiñ pyrthei jong ka TN hynrei kan plie lad ban wanrah ïa ka saiñ pyrthei kaba bha. Ka jingkheiñ jong nga ka long ba kane ka (kam bamsap) kan kot sha ka T. 40,000 klur. Hynrei nga don ha ka kyrdan kaba don jingkitkhlieh, kumta nga shim ïa ka pisa kaba la kdew da ka kynhun ED,” u la ong.
U la ong ba haba ka kynhun ED ka ai ïa ka “kaiphod ba khatduh” jong ka, u Stalin ruh u lah ban don ha ka radar.
Halor ka jingkylli halor ka ED kaba kham mynshwa kaba la thmu ïa u heh duh jong ka seng AAP bad u Myntri barim ka Delhi u Arvind Kejriwal bad ïa u nongïalam ka BRS jong ka Telangana u K Kavitha ha ka ‘kam bamsap’ jong ka Delhi Excise Policy kaba la weng noh mynta, u la ong ba ka kynhun tohkit jong ka sorkar pdeng ka leh tang pyrshah ïa ki jingbym ïaid beit.
Ka kynhun ED ka la ong kham mynshwa ba ka la lap ïa ki “jingbym hok kiba bun” ha ka jingtreikam jong ka TASMAC, kynthup ïa ka “jingleh thok” ha ki rukom ai Tender bad ki jingpynïaid pisa “bym don jingkheiñ” kiba shongdor T.1,000 klur lyngba ki kompeni pynmih kyiad.
Ka tnad sorkar pdeng ka la kam ba ka la ïoh ïa ki ‘sakhi’ kiba pynpaw ïa kine ki kam bamsap hadien ba ka la leit khynra ïa ki nongtrei, ki ophis jong ki kompeni jong ki karkhana shna kyiad bad ki karkhana jong ka TASMAC ha ka 6 tarik, Lber.
