Guwahati, Lber:
Ka sorkar Assam ka la rai ban pynïoh ïa ka hok sha ki nongshong shnong ha ka khyndew ka shyiap. Ha kaba ïadei bad kane ka bynta kumba la thmu hashwa ka la rai ban pynduh noh ïa ki lai tylli ki Proposed Reserve Forest (PRF) kiba don ha Tinsukia distrik namar ba ki la pynlah ïa palat 20 hajar ngut ki nongshong shnong ban ïoh ïa ka hok khyndew, ong u Myntri Rangbah ka jylla u Himanta Biswa Sarma.
Ha ka jingïalang jong ka kynhun Myntri, kaba la pynïaid da u Sarma, ka sorkar jylla ka la mynjur ban pynkylla ïa ka PRF sha ki shnong kamai khajna khnang ba ki briew kiba sah ha katei ka thaiñ kin ïoh ïa ka hok ha ki jaka puta.
Ki lai tylli ki PRF ki long ka Talpathar (170 hektar), Mohongpathar (466 hektar) bad ka 1st Addition to Duarmarah (113 hektar).
“Ki don palat 20,000 ngut ki briew kiba sah ha kine ki shnong bad kim shym la ïoh kano kano ka hok jaka namar ka jingkhanglad jong ki PRF. Dei na kata ka daw ba ngi la rai ban pynlong ïa kine ki PRF kum ki shnong ba ïoh khajna ha ka jaka ban pynlong ïa ki kum ki Reserve Forest,” la ong u Sarma.
U la ong ïa kane ka jingmynjur jong ka kynhun Myntri kum ka “rai kaba khraw” ban ai jingïarap ïa ki paidbah kiba don ha ka jingeh.
