Shillong, Lber 19
Ka lympung ïalehkai Super Division Shillong Cricket League 2024-25 ba la pynïaid da ka Shillong Cricket Association ka la nangjam shaphrang ha kaba ka Royal CC ka la ïoh jingjop hadien ba ka la lah ban pynliem ïa ka Sputnik Spartan da 8 wiket ha ka Sngi Balang.
Ha kane ka jingïakhun kaba la long ha madan Polo, ka Sputnik Spartan ka la kam trai shwa ban tied nyngkong ha kaba ka la ïoh tang 74 run bad shah pynhap 10 wiket ha ki 23.5 over. Kane ka la wan urlong lyngba ka jingïalehkai bha u Sikandar Kumar uba la lah ban shim 6 wiket na ka bynta ka Royal. Katba u nongtied ka Spartan u Supriyo Chanda u la lah ban ïoh 16 run na ki 20 bol.
Haba wan shimti ïa ka pali ba ar, ka Royal ka la lah ban kynjoh sha ka thong tang ha ki 8.3 over da kaba ïoh 75 run bad shah pynhap 2 wiket. U Roshan Warbah u la tied 23 run na ki 20 bol bad u Raj Biswa u la ïoh 19 run na ki 13 bol. Katba u Lakhan Singh u la shim 1 wiket na ka bynta ka Spartan. Ïa ka nam ‘Player of the Match’ la ïohpdiang da u Sikandar Kumar.
