New Delhi, Lber:
Ka Supreme Court ha ka sngi Balang ka la bthah ïa ka sorkar Rajasthan ban thung ïa u Nodal Officer ha Alwar distrik ban peit ïa ki jingujor halor ka jingtih beaiñ ïa ki marpoh khyndew hapoh shi kilomitar jong ka Sariska Tiger Reserve.
Ka kynhun nongbishar jong u Justice B R Gavai bad u Augustine George Masih ki la mynjur ïa kane ka hukum haba bishar ïa ki jingkyrpad kiba kam ba don ki kam tih beaiñ ïa ki marpoh khyndew hapoh shi kilomitar na ka jaka ri mrad watla ka ïingbishar ba hakhliehduh ka la khang ïa kum kane ka kam.
Ka sorkar Rajasthan ka la kyntait ïa kitei ki jingkynnoh bad ka la ong ba ïa ki jingjurip la pynlong da ki bor pynïaid wat ha ka por miet ruh ha ki surok bah ban khanglad ïa kino-kino ki kam kiba long khlem jingbit kum kine.
U Senior Advocate u K Parameshwar, uba ïarap ïa ka ïingbishar kum u paralok ba ïajan jong ka ïingbishar, u la ong ba ka jingthung jong ka jylla ïa u Nodal ophisar kan long ka lad kaba kham bha ban weng ïa ki jingeh. “Namar kata, ngi la hukum ïa ka jylla Rajasthan ba kan thung ïa u Nodal ophisar ha ka ophis jong u District Mining Officer, Alwar,” la ong ka kynhun nongbishar.
Mar ïapdiang ïa ka jingujor, ka kynhun nongbishar ka la ong ba u ophisar Nodal un shim ïa ka rai hapoh ar taïew. Ka ïingbishar ka la pynbeit ïa ki aplikeshon bad ka la ong ba lada ym shym la pdiang ïa kum kane ka jingujor, u briew uba shah pynrem u lah ban leit sha ka ïingbishar ba ha khlieh duh kaba don ha ka bor synshar.
U nongïasaid aiñ jong ki nongmudui u la ong ba ki jingbthah jong ka ïingbishar bahakhliehduh ban khang ïa ka kam tih marpoh khyndew kaba beaiñ hapoh shi kilomitar na ka jaka ri mrad ki long kiba la pynkheiñ. “Kim lah ban leh ei ei ka ban ktah jur ïa ka jaka sah jong ki mrad khlaw kaba kongsan khlem ka jingbit jong ngi,” la ong ka kynhun nongbishar.
Ka ïingbishar bahakhliehduh ha u bnai Jymmang jong u snem ba la lah ka la ong ba ka jingbteng ïa kano kano ka kam tih beaiñ ïa ki marpoh khyndew ha ka jingjngai kaba shi kilomitar na u pud u sam jong ka jaka sah jong ki mrad jong ka jaka ri mrad kan long ka jingpynkheiñ ïa ka hukum jong ka ha u bnai Ïaïong jong u snem 2023.
Ka ïingbishar bahakhliehduh ha ka rai jong ka ha ka 26 tarik, Ïaïong, 2023 ka la khang ban tih marpoh khyndew hapoh ka jaka ri mrad hajan ka jaka kaba jngai shi kilomitar na u pud u sam jong ka.
“Ha ka rai jong ngi ha ka 26 tarik, Ïaïong, 2023 la pynskhem shuh shuh da ka hukum jong ka 28 tarik, Ïaïong, 2023, ngi la khang ïa ki kam tih marpoh khyndew hapoh ka jingjngai kaba shi kilomitar na baroh ki jaka ba la ïada. Ha ka dor jong ka jingpynkylla biang, ki jaka ba la ïada kin ym mut tang ïa ki jaka ri mrad khlaw, ne ki mrad ha ki Nation Park, hynrei ruh ki jaka ri ne jaka ba im ki khla,” la ong ka hukum jong ka ïingbishar kaba ha ka 15 tarik, Jymmang, 2024.
