New Delhi, Lber:
Ki pulit jong ka Hyderabad ha ka sngi Balang ki la bthah ïa u MLA jong ka Bharatiya Janata Party (BJP) Goshamahal u T Raja Singh ban leit jingleit da ka kali ba lait na ka jingksam ki kuli bad ki bor pahara ba la pynbiang ïa u da ka Sorkar Telangana hadien ba u la shah byrngem pynïap.
Hynrei u Singh ha ka sngi Palei u la ïasam ïa ka jingpynbna ba la wan na ki pulit ka Hyderabad, da kaba ong ba ki la kyntait ïa ka jingpan jingbit jong u ban buh ïa ka tiar siat kaba don License.
“Ka long ban pyntip ïa phi ba phi la ju ïoh ïa ki jingshah byrngem, bad la ïohi ba phi ju mih na ïing sah bad ophis jong phi khlem ki bor pahara, da kaba ïaid hapdeng ki paidbah, kaba pyni ïa ka jingbym shimkhia ïa ka jingshngaiñ jong phi. Ha kaba ïadei bad kane, la kyrpad ïa phi ba phi la dei ban ai jingïada ïalade da kaba pyndonkam da ki kali Bulletproof bad ban pyntikna ïa ka jingdon jong ki nongpahara ban buh da ka sorkar khnang ban lah ban ïada na kino kino ki jingjia basngewsih kiba lah ban jia nangne shakhmat,” la ong ka shithi ba la thoh sha u MLA ka BJP.
U Singh u la ong ha ka kyrwoh, “Kaei kaba pynpaw pyrthei ïa ka jinglong arsap jong ka rukom treikam ka long ba haba nga la pan License na ka bynta ban shngaiñ, kajuh ka tnad pulit ka la kyntait ïa ka jingaplai jong nga, da kaba kdew ïa ki mukotduma pyrshah ïa nga. Kaba sngewsih ka long ba ki don bun ki briew kiba don ki mukotduma kiba dang sahteng kiba la ïoh License khlem kano kano ka jingpyrshah”.
U Singh u la ong ba watla la ai jingmut ban sangeh noh ïa ka jingleit jingwan da ka kali arshaka jong u ha ka thaiñ Goshamahal, hynrei kam long kaba lah ban leh. “Hynrei, ka jingshisha jong ka konstitwensi jong nga ka long kaba pher bha. Ka Goshamahal ka kynthup ïa ki Colony, ki jaka ïadei ïathied ha ki Slum, ki lynti rit, bad ki lynti ïaid kjat ha kaba ka kali BulletProof kam lah ban ïaid khlem da wanrah jingeh ïa ki paidbah. Ka jingpyrkhat kaba hashwa jong nga ka long na ka bynta ki briew jong nga bad ba ka jingleit jingleit jong nga da ka kali arshaka ka pynsuk ha ka ban ïakynduh ïa ki briew khlem da ïakynduh jingeh,” la bynrap u MLA.
