Mumbai, Lber:
Ka Central Bureau of Investigation (CBI) ha ka sngi Palei ka la aiti ha ka ïingbishar ba kyrpang ïa ka thup kyrteng kaba ar jong ki sakhi ha ka mukotduma ba ïadei bad ka jingshah pynïap jong ka Sheena Bora, kaba kynthup ïa ka Vidhie Mukerjea ka khun jong kaba shah kynnoh ka Indrani Mukerjea.
Ha kane ka thup la kdew ïa ki 125 ngut ki briew ha kaba ka kynhun tohkit ka tyrwa ban wad bniah kum ki nongsakhi kiba shah pynngat ha katei ka mukotduma. Kane ka long nalor ka thup banyngkong eh ba la aiti da ka CBI ha ka taïew ba la dep kaba la jer kyrteng ïa 69 ngut ki nongsakhi.
Ha ka taïew ba ladep, ka Indrani Mukerjea, kawei na kiba la shah kynnoh ha ka mukotduma, ka la pan jingshai na ka kynhun CBI, la ka Vidhie, ka la shah pynhap kum ka nongsakhi, khnang ba kan ïoh ban ïakynduh ïa ka.
Haba ka Indrani ka la shah pyllait jamin, kawei na ki kyndon, kaba la buh halor jong ka, ka long ba kam dei ban ïakynduh ïano ïano ruh na ki nongsakhi ha ka mukotduma.
Ka Vidhie ka dei ka khun jong ka Indrani hadien ba la shongkurim bad u Sanjeev Khanna, uba dei ruh uwei na kiba la shah kynnoh ha ka mukotduma. Ka Sheena Bora, ka khun jong ka Indrani na ka jingïadei kaba kham mynshwa, la kynnoh ba ka la shah pynïap ha ka Indrani, u nongñiah kali jong ka, u Shyamvar Rai, bad u kurim barim jong ka, u Khanna.
Nangta la thang ïa ka met jong ka bad la bret ïa ka ha kawei ka khlaw kaba don ha Raigad distrik.
Kane ka kam runar ka la paw ha u snem 2015 haba u Rai uba la kylla long u nongmynjur hadien ha katei ka mukotduma, u la pynpaw ïa ki jingtip ba bniah hadien ba la kem ïa u ha kawei pat ka mukotduma.
Ki heh nongpynïaid barim jong ki lad pathai khubor, ka Indrani bad u Khanna, ki la shah kem ha u bnai Nailar, 2015, bad u Peter Mukerjea, uba dei u kurim barim jong ka Indrani bad uba dei ruh u heh nongpynïaid jong ka lad pathai khubor, u la shah kem hadien lai bnai ba la jia ka jingjia. Baroh kiba shah kynnoh ki don mynta ha ka jingshah pyllait jamin.
