Bhubaneswar, Lber:
Kumba la dep ban ïarai, la ong ba nangne shakhmat yn sdang da ka sienjam kaba tyngeh pyrshah ïa ki nongkhaïi drok jong ka Twin City Bhubaneswar bad Cuttack, ong u Police Commissioner S Dev Datta Singh ha ka Sngi Balang.
Haba kren sha ki lad pathai khubor, u Singh u la ong ba yn pynshitom da kaba tyngeh ruh ïa ki nongdie drok lada lap ba ki pynngop ïa ki samla pule bad ki samla sha ka jingdih drok.
“Ki pulit kin ïarap ïa ki samla kiba la rai ban sangeh ïa u drok bad kin pynsuk ïa ka jingrung jong ki ha ki jaka ne ki kynhun ban pynbha pat ïa ki,” u la bynrap.
Kane ka jingmaham ka wan hadien ka jingshah kem jong san ngut bad ka jingshah set jong uwei u khynnah rit na ki ar tylli jaka bapher bapher ryngkat bad u Brown Sugar uba shongdor T.72 lak. Da kaba pynsted ïa ka jingpyntreikam hadien ba la ïoh jingtip, ki pulit ka Maitri Vihar ki la kem ïa 5 ngut ki briew hajan Hatiasuni ha katei ka sngi bad na ki la ïoh ban kurup 270 gm u Brown Sugar uba shongdor T.27 lak, kawei ka kali, kawei ka kali ar shaka bad saw tylli ki Mobile Phone na ki.
Ha kajuh ka jingjia, ka kynhun ba kyrpang kaba ju ïakhun pyrshah ïa ki kam sniew ha ka jingkhynra hajan ka surok Xavier hapoh u pud u sam jong ki pulit ka Nayapalli ha ka Sngi Ba-ar ka la kem ïa uwei u khynnah rit uba don 448 gm u Brown Sugar. Uwei u nongkhaïi drok uba la tip kyrteng kum u SK Shoit na Balasore u la synran lang ïa une u khynnah ba dang rit ka rta u la ïohlad ban phet krad noh na kti jong ki heh ka kynhun.
Ka jingtohkit ka la pynpaw ba kitei ki arngut ki dei shi bynta jong ka kynhun nongkhaïi drok kaba kham heh bad la ïathuh ba ki don ka jingïadei bad ki nongdie Brown Sugar ha West Bengal.
