Patna, Lber:
U heh ka seng Rashtriya Janata Dal (RJD) uba dei ruh u Myntri Rangbah barim ka Bihar u Lalu Prasad ha ka Sngi U Blei u la pynthikna biang ba ka sorkar ban wan ha Bihar kan long hapoh ka jingïalam jong u Tejashwi Prasad Yadav.
“Ym don ba lah ban khanglad ïa u Tejashwi ban long Myntri Rangbah,” u la pynbna haba kren sha ki lad pathai khubor ha shilynter jong ka jingïalang ha Bihar, East Champaran District.
U Lalu Prasad u la ban jur ba u Tejashwi u ïoh ïa ka jingkynthoh kaba jur bha na ki paidbah ha ki jingïalang jong u. “Kane ka dei ka por kaba biang bha ba ki nongtrei ki dei ban sdang noh ïa ka jingpynkhreh na ka bynta ka ilekshon”, la ong ha ki nongïalam ka seng.
Da kaba pynduh ïa ka jingartatien halor ka jingkyrmen jong u Tejashwi ban long Myntri Rangbah hadien ka ilekshon sha ka ïingdorbar thawaiñ, u Lalu u la pynskhem ba un long Myntri Rangbah da ka jingkyrkhu jong ki briew. U la kyntu ïa ki nongtrei jong ka seng ban pyntip sha ki paidbah shaphang ki jingkular jong ka RJD ha ka por thep vote bad ki jingkular ba la ai ha ka jingpynbna ilekshon jong ka.
Haba pynpaw ïa ka jingpynbna jong ka seng, u Lalu Prasad u la pynpaw ba ka ‘Bhai-Behan Maan Yojana’ kan long ka jingkyrkhu ïa ki kynthei. Hapoh katei ka skhim, ki kynthei kiba duk kin ïoh T.2,500 shibnai, kaba pynlah ïa ki ban im da ka burom.
U la pynbna shuh shuh ba, lada jied ïa ka bor, ka RJD kan pynhiar dor ïa ki Cylinder LPG sha ka T.500 bad kan pynkiew ïa ka bai tymmen na ka T.400 sha ka T.1,500 shibnai. Nalor kata, yn ai 200 unit ka bording khlem da siew ei ei.
“Ka dei ka kamram jong ki nongtrei jong ka seng ban pynsngewthuh ïa ki briew shaphang kine ki skhim jingïarap,” ong u Lalu ha ka jingïalang jong ki nongkyrshan, da kaba ban jur ïa ka jingdonkam ban pynkhlaiñ ïa ka jingpynbeit seng jong ka seng ha ka kyrdan jong ki Booth shwa ka ilekshon Assembly ha u bnai Risaw-Naiwieng.lur.
Ha kajuh ka por, u nongïalam ka liang pyrshah ha Bihar Assembly, u Tejashwi Prasad Yadav u la kynthoh ïa u Myntri Rangbah ka jylla u Nitish Kumar halor ka jingsniew ka suk ka saiñ ha kane ka Jylla. Haba kdew ïa ki jingshah pynïap briew kiba la bud ryntih, kynthup ïa kiba ïadei bad kiba haïing hasem jong ki Myntri ka sorkar pdeng, u Tejashwi u la thoh ha ka rynsan phah khubor ka ‘X’, “Ka jingkheiñ ïa ki jingshah pynïap briew ka dang ïai bteng.”
Haba shim jingkynthoh ïa u Myntri Rangbahduh ka ri u Narendra Modi, u Tejashwi u la kynthoh ba ki briew ha Bihar ki dang long ki ‘bym shngaiñ’ ha kaei kaba u Modi u la batai mynshwa kum ka ‘Mangal Raj’ ha ki jingïalang paidbah jong u. U la pynmih ruh ïa ki jingtip halor ki kam runar ba dang shen kiba la pynkyndit ïa ka jylla.
Hynrei ki nongïalam na ka Janata Dal (United) bad ka Bharatiya Janata Party ki la ïada ïa u Nitish Kumar, da kaba ban jur ba ki nongleh bymman ki shah pynngat stet sha ka aiñ. U nongaiktien ka JD(U), u Neeraj Kumar u la ong, “Ym don kano kano ka kam runar kaba la pynbeit ryntih kaba jia ha Bihar. Hooid, ki jingjia ba man ka por ki ju jia, hynrei la kem ïa ki nongshah kynnoh, bad la leh da kaba tyngeh pyrshah ïa ki.”
