Bengaluru, Lber:
U lamphang ka ïingdorbar thawaiñ u UT Khader ha ka sngi Saitjaiñ u la ong ba lada ki 18 ngut ki MLA ka BJP ki phah ïa ka jingkyrpad, un sa pyrkhat ban pynduna ïa ka jingkhang kaba hynriew bnai jong ki.
U Khader u la khang ïa ki MLA na ka ïingdorbar ha ka sngi Thohdieng namar ba ki la pyni ïa ka jingbym burom ïa ka shuki jong u da kaba tar ïa ki kot ki sla bad kawang sha u, nalor ba ki la kiew halor ka shuki jong u bad khanglad ïa u ban pyndep ïa ki kamram jong u.
U la leh katkum ka kyndon 348 jong ka kyndon treikam bad jingpynïaid jong ka ïingdorbar thawaiñ jong ka Karnataka.
Haba kren ha ka jingïalang bad ki nongthoh khubor hangne, u Khader u la ïada ïa katei ka jingleh jong u, da kaba ong ba u la khang ïa ki MLA namar ka jingleh bymsuitñiew jong ki ha ka ïingdorbar bad namar ka jingbym burom ïa ka shuki u Lamphang.
“Ka rai ka dei kaba la shim ha ka por ba ka jingjia ka jia ym da kano kano ka jingpynbor na ka sorkar, ngi la leh ïa kata khnang ba kin pynbeit ïa ki jingbakla jong ki.
Kim sngew ba ki la leh ïa kaei kaei kaba bakla. Hato kim dei ban sngewthuh ïa ka jingbakla jong ki? Dei ban pynbeit ïa kum kane ka jinglong. Ka jingshah khang shipor jong ki MLA bam leit sha ka dorbar ka dei ka jingpyrshang ban hikai ïa ki ïa ka jinglong ryntih”, u la ong.
U la shim ïa ka jingpynkylla kaba jur ïa ki MLA kiba la tar ïa ki kot ki sla, kynthup ïa ki Bill kiba la buh kyrteng ban wanrah ha ka miej ïakren.
“Hato ka long kaba dei ban pynthut ïa ka Finance Bill, kaei ka ban jia lada ki la sangeh ban pynmih sur, kane kam dei kaei kaei kaba tang ma nga hi nga dei ban pyrkhat, ngi dei ban trei ban wanrah ïa ka jingburom ïa ka riti synshar ka ri”, u la ong.
