Hyderabad, Lber:
U Myntri barim u T Harish Rao u la dawa na ka sorkar ban ïarap ïa ki nongrep kiba shah pynjulor ki jingthung jingtep na ka daw jong u slap ba khlem aïom ha kane ka jylla.
U la leit jngoh ïa ka shnong Lakshidevipally ha Narayanraopet Mandal ha ka sngi U Blei bad u la jurip ïa ki jingthung jingtep kiba la julor. Haba kynnoh ba ka sorkar Congress ka thok ïa ki nongrep da kaba pynjlan ban map ïa ka ram kaba T. 2 lak, u nongïalam jong ka seng BRS u la ong, “U Myntri Rangbah barim ka Telangaka u K Chandrasekhar Rao u la ai jingïarap ïa ki nongrep hapoh ka Rythu Bandhu. Lada kane ka sorkar (Congress) ka la pyllait ïa ka Rythu Bandhu, ki nongrep kin ym mad jingeh kumne.”
U la bynrap shuh shuh da kaba ong ba ka sorkar haduh mynta kam pat pyllait ka jingai jingïarap sha ki nongrep na ka bynta ka aïom Kharif bad u la bynrap da kaba ong ba ki nongrep kim pat ïoh jingkyrshan pisa ha kaba ïadei bad ki jingthung jingtep.
U Harish u la kynnoh ba u Myntrei Rangbah u A Revanth Reddy u la kren lamler halor ka jingmap ïa ka ram ha ka ïingdorbar thawaiñ. “Kumba ka long mynta kam shym la don satia ka jingrang tyrkhong. Ki jingthung ki tyrkhong namar ka jingbym shimkhia jong ka sorkar”, u la kynnoh da kaba kyrpad ïa ka sorkar ban phah ïa ki ophisar kiba dei khmih ha ka kam rap kam riang sha ki lyngkha ban bishar bniah ïa ka jingduhnong baroh jong ki jingthung.
