Shillong, Lber 27
Ka kynhun ïalehkai senior jong ka ri India ka la pynngat lang ryngkat ka Thailand, Mongolia, Timor Leste bad ka Iraq kiba don ha ka Group-B na ka bynta ka AFC Women’s Asian Cup Australia 2026 Qualifiers.
Ïa kane ka jingpynïakap la pynlong ha ka shlem treikam jong ka AFC kaba ha Kuala Lumpur.
Ka Thailand kan pynlong ïa jingïalehkai qualifier jong ka Group-B hapdeng ka 23 tarik u Jylliew haduh ka 5 tarik u Naitung ha ka dur jong ka Centralised Single Round Robin. Ki kynhun nongjop kin ïoh rung sha ka wat kaba khatduh, kaba la buh ban pynlong ha kylleng ki lai tylli ki nongbah kiba ha Australia naduh ka 1 tarik haduh ka 26 tarik u Lber jong u snem 2026.
Ïa ki kynhun la phiah ha ki san tylli ki group katkum ka jingpynbna da ka FIFA kaba la pynmih ha ka 6 tarik mynta u bnai.
Ha kane ka lympung kin don haduh 34 tylli ki kynhun ki ban ïasoh lang ryngkat ka Australia kaba long ka nongpdiang ïa kane ka lympung ïalehkai bad ki lai tylli ki kynhun ba paw na ka AFC Women’s Asian Cup India 2022 kata ka China PR kaba long ka lahduh, kumjuh ka Korea Republic kaba wan ba-ar, bad ka Japan kaba wan ha ka kyrdan kaba lai.
Ki hynriew tylli ki kynhun kiba don hakhmat eh ha ka AFC Women’s Asian Cup Australia 2026 kin rung sha ka FIFA Women’s World Cup Brazil 2027.
