Shillong, Lber 30
Ka jingïakhun dohïap jong ka NorthEast United FC ban ïoh rung sha ka semi final ha ka Indian Super League kam shym la urlong. Kane ka la jia hadien ba ka la mad ïa ka jingshah rem ha ka kynhun jong shiphew ngut ki rangïalehkai ka Jamshed-pur da 2-0 kol ha ka playoff kaba la long ha ka sngi U Blei ha Jawaharlal Nehru Stadium, Shillong.
Kane ka nam jop ka la wan urlong lyngba ka shi kol ba la thep da u Stephen Eze bad u Javi Hernandez na ka bynta ban pynlong ïa ka Jamshedpur ban ïakynduh semi final pyrshah ïa ka Mohun Bagan.
Kumba ka paw kane jingïakhun kaba la long ha nongbah Shillong ka la long ka kabu kaba biang eh na ka bynta ka NEUFC hakhmat jong hajar ngut ki nongkyrshan kiba la pyndap ïa katei ka stadium, hynrei ka la long da khongpong namar kam shym la lah ban ïoh ïa ka jingjop.
Kane ka jingïakhun ka la long kaba itynnad bad kaba ïakhaid bha namar baroh ar ki kynhun ki khmih lynti ban ïoh ïa ka jingjop khnang ba kin lah ban jam sha ka semi final. Ka Jamshedpur ka la pynkhih jar nyngkong eh lyngba u rangïalehkai ‘dien u Stephen Eze, uba la ïoh ban shut da ka kjat kamon hadien ka free-kick ha ka mint kaba 28.
Hadien ba la bteng ïa ka jingïakhun jong ka kylla miet, ka NorthEast United ka la ïakhun tyngeh ha kaba ka la ïoh ïa ki kabu kiba biang ban pynphai, hynrei kam shym la lah ban pynurlong. U Jithin Madathil Subran uba la ïoh ban shut beit beit sha kol, hynrei um shym la lah ban pynurlong hadien ba la ïarap ban pynbuh bol da u Macarton Nickson ha ka minit kaba 52. Kumjuh u Alaaeddine Ajaraie, u la pynlehnohei da kaba shut shabar na u diengkol hadien ka jingïarap pynbuh da u Nestor Albiach.
Hapdeng kane ka jingïakhun kaba tyngeh ha kaba ka NorthEast United ka la ïalehkai tang shiteng madan ban thom naphang, hynrei ki rangïa -lehkai ka Jamshedpur ki la shu ïashan tyngeh ban pyllait na ka jingshah thep bad dei na kane ka daw ba u Alaaeddine um shym la lah ban thep wat la u la ïoh ïa kabu kaba biang bha ha ka minit kaba 69.
Ka Jamshedpur ka la hap ban ïalehkai sa tang shiphew ngut hadien ba u Mobashir Rahman u la shah sei da ka red card ha u rephri na ka daw ba u la ïuh da ka kjat ia uwei na ki rangïalehkai ka NorthEast United ha ka minit kaba 88.
Ha ka jingshisha ka NEUFC ka la dei ban ïoh bor bha ha ka rukom ïalehkai, hynrei shwa ban wan ka la shah thep biang sa shi kol ha u Javi Hernandez ha ka minit kaba 90+9 na ka jingbym lah ban teh lakam da ki rangïalehkai shadien jong ka.
Te kumta ka Jamshed-pur kan pynkhreh ïa ka jingïakhun semi final (1st leg) pyrshah ï aka Mohun Bagan ha ka 3 tarik u Ïaïong ha JRD Tata Sports Complex Stadium bad ka wat kaba ar kan long ha ka 7 tarik. Katba kawei pat ka jingïakhun semi final kan long hapdeng ka Bengaluru FC pyrshah ïa ka FC Goa ha ka 2 tarik ha Bangalore bad ka wat kaba ar kan long ha ka 6 tarik.
