To ngin ïeng pyrshah ïa kiei-kiei ki bym pynmyntoi ïa ka ri. Ha ka jingïohi barit jongnga ka kam pynjot ïa ka mei mariang ka kam dih drok, ka jingsngewpher niam ki long ki jingsniew kiba ktah jur bad pynthohbria ïa ka imlang ka sahlang. ïa kine keiñ ngi dei ban ïeng tylli ban pyrshah ban ym ïoh rung ha ka imlang ka sahlang ka jaitbynriew. Lada ngi lait na kine ka ri bad ka jaitbynriew kan kiew shaphrang.
Ka jingsngewpher niam na ka jingngeit ka pyntroiñ ïa ka jaitbynriew ba rit paid. Ka jingkyrni dih ïa u drok ka pynjot ïa ka longrynïeng u briew ne ka briew bad ïa ka ïing ka sem. Ka jingpynjot ïa ka mei mariang ka long kaba sniew tam eh kaba lah ban pynkylla lyngkhuit bad shem kyrduh ka bam ka dih na ka ri bad ka jaitbynriew. Ka mei mariang ka long ka nongbsa ïa ka jaitbynriew lyngba kiei-kiei kiba ngi ïoh na ka. Kumta ïa kine ki lai tylli ki mat heneng, ka jingpynjot ïa ka mei mariang, ka kam dih drok bad ka jingsngew pher niam ki long ki lai tylli ki mawbyrsiew kiba pynking khlieh ïa ka jingmut jingpyrkhat jong u briew, kine ki pynjot ïa ka longbriew manbriew bad ki khang lad ïa ka shongsuk shongsaiñ bad ka jingshngaiñ ki briew.
Hynrei kawei na ka jingïohi barit jong nga balei ngi ïeng pyrshah pynban kum ïa ka lynti Rel. Ka lynti Rel kam dei kaba sniew namar ka plie lad plie lynti bad kaba ai jingmyntoi ïa kum ka lad kamai kajih bad ka pynroi pynpar ïa ka ïoh ka kot ka Jylla. Ka lynti Rel, ki surok kali, ki liengsuiñ kit briew ki dei ki mat ba kongsan ba ai jingmyntoi ïa ka ri bad ka jaitbynriew. Kine ki kham ai bun ki jingmyntoi ban ïa ka jingmyntoi ban ïa ka jingbym myntoi. Kumta ngi dei ban da pyrkhat bha ïa kiba kum kino ngi dei ban ïa pyrshah bad ïa kiba kum kino ngin ym pyrshah. ïa ki kam bym ai jingmyntoi ngi dei ban ïeng pyrshah hynrei ïa ki mat ba wanrah ka roi ka par ka jaitbynriew ym dei ba ngin ïa pyrshah. Kane ka long ka jingïohi jongnga ba ngi dei ban pdiang ïa kiei kiei kiba bha bad ngi dei ban kyntait ïa kiba sniew ban im ka ri bad ka jaitbynriew.
C. B. Iawphniaw
