Raipur, Lber:
Uwei u heh nongïalam jong ka Maoist uba donkti ha ka jinghiar thma ha Jhiram Ghati ha u snem 2013, ha kaba katto-katne ngut ki nongïalam jong ka seng Congress ki la ïap. U la long ruh napdeng 18 ngut ki Maoist kiba la shah siat ha ar tylli ki jingïasiat kaba markylliang ha Sukma bad Bijapur distrik ha ka bynta ba shaphang Shathie jong ka Chhattisgarh ha ka sngi Saitjaiñ, ong ki heh pulit.
U Kudhami Jagdish ïa uba la khot sin kum u Badhura, u dei u dkhot jong ka Dandakaranya Special Zonal Committee, kaba dei ka komiti ba heh duh jong ka jylla ha Chhattisgarh jong ka seng Komunist Party of India (Maoist) kaba la shah khang pyrshah, u dei ruh uba dei u nongpeit ïa ka tnat Darbha bad u la kit ruh ïa ka khusnam kaba T.25 lak tyngka.
Ka jinghiar thma ha Jhiram Ghati, ka la pynïap ïa 32 ngut ki briew, kiba kynthup ïa ki nongïalam ka Congress jong ka jylla, u Mahendra Karma, u Nand Kumar Patel, u Uday Mudliyar bad u Vidya Charan Shukla. “U dei ruh u nongshna ïa ka jingbthei bom IED ha Aranpur ha u snem 2023 ha kaba 10 ngut ki jawan jong ki DRG bad uwei u nongñiah kali riew paidbah ki la ïap”, la ong uwei u heh pulit.
U Jagdish, uba la don kumba 40 snem ka rta, u don ka rekod kam runar kaba jrong bha, ha kaba uwei u heh ophisar, u la kam ba u donkti ha palat 100 tylli ki kam pynïap ïa ki shipai pahara, ki riew paidbah bad ki riew saiñ pyrthei. U la wan na Dantewada bad u la long u nongïalam bakongsan jong ka Maoist kumba arphew snem eiei. Ka kurim jong u, kaba dei ruh ka Maoist, ka la shah pynïap ha ka jingïasiat kaba markylliang ha ki por ba la dep, la ïathuh ki heh pulit.
U heh pulit ka Sukma u Kiran Chawan u la ong ba ki la ïoh jingtip halor ka jingdon jong ki Maoist kiba rieh tngen ha ka jaka khlaw ha ki jaka lum kaba rben ha kylleng ki shnong Gogunda, Nendum, bad Upampalli kiba hap hapoh ka jingpeit jong ka jaka treikam jong ki pulit ka Kerlapal, kaba jngai kumba 50 km eiei na ka ktem jong ka Sukma bad kaba jngai kumba 20 km na u pud u sam jong ka shnong Danstriwa.
“Ka kynhun ïatreilang jong ki shipai District Reserve Guard (DRG) bad Central Reserve Police Force (CRPF) ki la leit sha ka jingkhynra ha ka sngi Thohdiengi”, la ong u Chawan.
Ka jingïakynad ka la jia ha ka por 8 baje mynstep ha ka jaka lum, ha kaba ki Maoist ki la siat ïa ki shipai. Ki shipai ki la kiew ïa ka jaka lum ban ïaleh pyrshah. Baroh saw ngut ki shipai langrut, lai ngut na ka DRG bad uwei na ka CRPF, ki la mynsaw. Baroh saw ngut, la pynkynriah noh da ki shipai Indian Air Force bad la pynthiah ïa ki ha ka jaka sumar jong ka distrik, ha kaba la ïathuh ba ki la kham ïohbor.
U Inspector General jong ki pulit na ka bynta ka lum Bastar, u Sundarraj P, u la ong, “Ïa kane ka jingkhynra la pynlong ha shilynter ka lum Gogunda, kaba don ha shilynter ka thaiñ khappud jong ka Sukma/Dantewada.
“Ka jingpynïaid ïa ka lynti khlaw kaba la tih jur da ki Naxal ka dei kawei pat ka jingeh, kaba la ïakren da ka jingstad da ki bor pahara”, la ong u Sundarraj.
Hadien ba la kut ka jingsiat, la pynlong ïa ka jingkhynra, bad la lap ïa ki met ïap jong ki 17 ngut ki lehnoh Maoist, ba kynthup ïa 11 ngut ki kynthei. Ki heh sorkar ki la ïathuh ba ki Maoist ki dang pynlong ïa ka jingïalang kaba rieh ha ka por ba ki bor pahara ki la ïaleh pyrshah ïa ki. Lait na u Jagdish, la ithuh sa 6 ngut ki nongïalam Maoist kum ki dkhot jong ka kynhun ka thaiñ, kumjuh kiba dei peit ïa ka kynhun jong ki nongrep bad ka Chaitya Natya Mandal (CPM).
Sa uwei pat u Maoist u la shah pynïap ha ka jingïakynad ha khlaw jong ka Tekmeta bad Narsapur kaba hap hapoh ka jingpeit jong ka jaka treikam jong ki pulit ka Basaguda kaba don hajan ka Sukma ha Bijapur distrik. Kane ka kynthup ïa ki 117 ngut na ka thaiñ Bastar.
