Chennai, Lber:
Ki nongbud jong ka DMK ki la pynlong ïa ki jingïakhih ha palat 1,600 tylli ki jaka, ym duna ïa ka ar tylli ki jaka ha baroh ki Panchayat ha kylleng ka jylla, ha ka sngi Saitjaiñ, da kaba pynrem ïa ka sorkar pdeng namar ba kam shym la pyllait ïa ka bai lutksan kaba kot sha ka 4,034 klur tyngka hapoh ka Mahatma Gandhi National Rural Employment Guarantee Scheme (MGNREGS) sha ka Tamil Nadu na ka bynta san bnai.
Katkum ki tyllong khubor, ki nongïoh jingmyntoi na ka MGNREGS, kiba kham bun ki kynthei, ki la ïashim bynta ha ki jingïakhih da kaba bun bha. Ki la pynmih ïa ki jingpyrta pyrshah ïa ka sorkar pdeng, kaba la pynmih ha ka kot khubor jong ka seng ‘Murasoli’.
“Ka sorkar BJP kaba la sngewkutlad ka thmu ban bat ïa ka pisa, ka pynshitom ïa ki baduk ha ki jaka nongkyndong jong ka TN namar ba ki la kyntait ïa ki ha ka por thep vote”, la kynnoh u Myntri Rangbah. U la bynrap ruh da kaba ong, “Pynsangeh noh ïa kane ka jingleh donbor pyrshah ïa ki paidbah ka TN.” Ha ka jingthoh kaba kham mynshwa, u Stalin u la ong ba ka sorkar ha katei ka pdeng kam sngewtynnad ïa u Gandhi lane ïa ka skhim ba la ai kyrteng ïa u.
U Symbud Myntri Rangbah u Udhayanidhi Stalin u la thoh ruh halor ka rynsan X, “Ka MGNREGS ka dei ka thylliej jong ka ïoh ka kot nongkyndong bad ka jingim jong ki paidbah ba rit paid. Ngim lah satia ban pdiang ba la bat ïa ka pisa kaba la thmu na ka bynta kane ka skhim. Lada kane ka jingleh shiliang khmat jong ki nongleh donbor ka dang ïai bteng, ka TN kan pynshitom biang ïa ki.”
