Chennai, Lber:
U Myntri Rangbah ka Jylla M K Stalin un plie ïa ka Government Medical College Hospital ha Nilgiris bad 17 tylli ki PHC/SHC ha ka 6 tarik, Ïaïong, ong u Myntri ka tnat ka koit ka khiah u Ma Subramanian ha ka sngi U Blei.
Haba kren sha ki lad pathai khubor hadien ba la dep jurip ïa kane ka Hospital, u Subramanian u la ong ba kane ka dei tang ma ka ka Hospital ha kane ka thain lum ha India kaba don 700 jingthiah bad ka ward kaba 50 jingthiah kyrpang tang na ka bynta ki riewlum.
“Ka jingdawa kaba la ap slem bha jong ki nongshong shnong jong ka Nilgiris na ka bynta ki jingdonkam ba kham bha ha ka liang ka jingsumar ka la urlong. Kane ka dei tang ma ka ka hospital ha ri lum ha India kaba don 700 tylli ki jingthiah. Kiwei pat ki jingdonkam ki kynthup ïa ki shiphew tylli ki jaka sumar, kiba kynthup ïa ka jaka leh MRI, ki CT Scan bad kiwei kiwei.”
Shuh shuh, u Myntri u la ong ba la pynbha ïa ki jaka sumar ha ka jinglut kaba T.22 klur ha ki GH ha Emerald, Coonoor bad Kotagiri . “Ïa ka jingshna ïa ki hynriew tylli ki Ayush Wellness Clinic ha ki hynriew tylli ki PHC, saw tylli ki Sub-Health Centre, ki jingtei ba kham bun sha ki ar tylli ki PHC ha Theppakkadu bad Ithalar bad ka Urban Wellness Centre ha RK Puram la leh ha kane ka distrik.
Halor ka jingpynrungkam ïa ki doktor, u Subramanian u la ong “Ha u bnai Ïaïong, 2024, palat 70 ngut ki doktor la thung kamn ha Nilgiris. Dang shen la pyndap ïa ki kam ba lait jong ki 36 tylli bad mynta ym don jaka shuh ban lait ha kaba ïadei bad ka jingpynrungkam doktor ha kino kino ki GH. La pyrshang ban pyndap ïa ka jaka jong ki doktor kiba tbit ban sumar hala kijong-kijong ki jingshitom.”
Shwa kane ka sngi, u Myntri u la leit ban jngoh ha ka por bym poi pyrkhat ïa kawei ka PHC kaba don ha Pogalur hajan Annur ha Coimbatore bad pan jingmut na ki nongpang ha kaba ïa dei bad ka jinglong jingman jong ka jingsumar.
