Ka ai jait sha ka kmie ne ka ai jait sha u kpa (Shynrang) ka dei ka jingai ka jong u Kynrad (Blei) naduh kulong kumah bad ka dang ïai sah haduh kine ki sngi. Ka jingai jait ka dei ka mon laitluid jong u briew ym dei ban pynbor mano mano ïa kane ka rukom ai jait kheiñ jait ha ngi ki briew. Kita kiba ai jait sha u shynrang ne u kpa ki dei ban sngewsarong kumba u Blei u la buh ïa ki. Kumjuh kito kiba ai jait khein jait sha ka kmie ruh ki dei ban sngewsarong kumba u longshuwa manshuwa u la buh. Kam don jingmut ka jingia kynthoh markylliang hapdeng kiba ai jait kmie bad kiba kwah ai jait kpa.
Namar ka jing-ai jait ka shong ha ka mon u briew. Ka jingsngew bad jingkren ba ki khun ki wad ïa la ka jong ka kmie ka long kaba bit bad kumjuh ki khun kiba kwah ban ai ïa ka jingieid sha u kpa ruh ki sngewkmen ba ki leh kumta. Ka jingïadei hapdeng ka kmie bad u kpa bad ki khun ngi ban sngewsarong haba don ka jingïasngewthuh jingmut lang. Ka bishni ka pihuiñ ngi dei ban klet noh. Ban ong ba ki khun ki kham ieid ïa ka kmie ban ïa u kpa ka dei ka jingkren laplah khlem pyrkhat sani bha. Ki khun kiba stad ki ieid mar kumjuh ïa ka kmie bad u kpa ruh. Tang ki khun jynrein ki ieid shiliang. Ka kynthei ka don la ka jong ka hok kaba u Blei u la ai ïa ka. Kumjuh u shynrang ruh u don ka hok kumba u Blei u la thaw ïa u kum u khlieh jong ka ïing.
U Blei u la thaw bad pynlong ïa ka kmie ba kan ai buiñ ïa ki khun. Kumjuh u Blei u la thaw ïa u shynrang ba un ri un bsa un pjiah ïa ki khun ba kin heh kin san ha ka jinglong doh bad ha ka mynsiem. Baroh arliang ki dei ban ïa kit ïa bah ïa ka lyngkor ki khun ba ki ioh. Ka ai jait kpa kam dei ba ñiewbeiñ ïa ka ai jait kmie. Kumjuh ka ai jait kmie kam dei ba ñiewbeiñ ïa ka jinglong kpa. Ki dei ban ïatreilang ryngkat kum shi tnga, kum kawei ka doh. Ban pynïasyriem ïa ka jingim ki mrad ki mreng bad ka jingim jongngi ki briew kam ïahap hangno hangno ruh. Namar ki mrad kim don ka jingiatip lem, katba u briew u don ka jingïatiplem kaba u Blei u la ai ha u. Ki mrad ki pher na u briew ha ka rukom im. Ki mrad kim tip Meikha Pakha katba u briew u tip kino ki Meikha kino ki Pakha. Ki mrad kim tip kmie kim tip kpa kim tip hynmen para ki ïa shongkha shi kpa shi kmie bad shi khun ruh katba lap ba shem. Katba u briew u tip bad u m ju ïa shong kha ïa la ka kmie lymne ïa ki hynmen ki para. Kane ka jingiapher hapdeng ka jingim ki mrad bad ka jingim jong ngi ki briew. U Blei u la thaw shynrang bad kynthei. Kumta ka dei hok ïa ki ban ïa shongkha hapdeng u shynrang bad ka kynthei.
Kam dei ka jingsniew ban shongkha hapdeng ka kynthei bad u shynrang. Ngi iohi ba bun na ki nongkynthoh ki la shah liang sha ka ai jait kmie bad kumjuh sha ka ai jait kpa. Dei ha kane ka daw ba ka don ka jingïapait ïa pra hapoh ka kur ka jait wat shi para ruh. ka ai jait kmie ne ka ai jait kpa ka dei ujuh u diengkot ne u diengthew. Ban shim ba dei tang ka kmie kaba peit ïa ka koit ka khiah jong ki khun ka long ka jingkren khyllung khynnah.Lada kiba ai jait kpa ki dei ki nongñiew beiñ kmie bad ïa ka kur ka jait. Kumta ka jingai jait sha ka kmie ka long ka jingbym kheiñ kor ïa u symbai ba u shynrang u la ai. Kane ka long ka jing-iohi jongnga kaba ïa dei bad ka ai jait kmie bad ka ai jait kpa.
C. B. Iawphniaw
