Shillong, Ïaïong 03
Ka Jamshedpur FC ka la ïoh jingjop ha ka semi final wat ba nyngkong jong ka Indian Super League (ISL) 2024-25, hadien ba ka la lah ban pynliem noh ïa ka Mohun Bagan Super Giant (MBSG) da 2-1 kol ha ka sngi Palei ha JRD Tata Sports Complex Football Stadium.
Kane ka nam jop ka la wan urlong lyngba u Javi Hernandez uba la thep shwa ban wai ka jingïakhun hadien ba ki la ïakhaid mar shi kol.
Ka Mohun Bagan ka la ïoh rung suk sha ka semi final hadien ba ka jop ïa ka League Shield, katba ka Jamshedpur ka la jam sha kane ka kyrdan hadien ba ka la jop ïa ka NorthEast United FC da 2-0 kol ha ka playoff kaba la long mynshem taïew.
Ha kane ka jingïakhun baroh ar ki kynhun ki la ïakhun tyngeh naduh kaba sdang. Dei ka Jamshedpur kaba la ïoh pynkhih jar nyngkong eh lyngba u Javier Siverio ha ka minit kaba 24, hynrei hadien shiteng kynta ka Mohun Bagan ka la lah ban pynphai kylla lyngba u Jason Cummings lyngba ka free-kick ha ka minit kaba 38.
Hadien ba la bteng ïa ka jingïakhun jong ka kylla miet kine ki kynhun ki la ïakhun tyngeh ha kaba ka Mohun Bagan ka la ïoh ïa ki kabu kiba biang, hynrei kam shym la lah ban pynurlong. Ha shwa ban wai ka Jamshedpur ka la ïoh ïa ka kabu kaba biang eh lyngba u Ritwik Das uba la rah ïa ka bol sha kol bad ban pynbuh na ka bynta u Javi Hernandez, u bym shym la pynlehnohei ïa kane ka kabu ksiar ha ka minit kaba 90+1 bad pynlong ban jop shisyndon.
Lyngba kane ka jingjop ka Jamshedpur ka la don jingkyrmen ban ïoh rung sha ka final, hynrei ka donkam ban ïalehkai bha sa ha ka semi final wat ba ar pyrshah ïa katei ka kynhun ba khlaiñ bor na Kolkata ha ka 7 tarik mynta u bnai.
