Shillong, Ïaïong 10
Ka Ri War Development Organisation (RWDO) ha ka 10 tarik u Ïaïong, 2025, ka la leit ban aiti da ka dorkhas sha u Chief Executive Member (CEM) jong ka Khasi Hills Autonomous District Council (KHADC), Bah Shemborlang Rynjah ha kaba ki la buh ïa ki saw tylli mat jingdawa ba kongsan ha kaba ïadei ban ïada bad ban kyntiew ïa ka hok jong ki trai ri trai muluk.
Ka RWDO lyngba ka dorkhas ba la aiti sha u CEM, ka la kyntu ïa ka District Council ban pynbha ïa ki ïew kiba ju pynlong manla ka taïew kiba la don lypa bad ka seng ka la ai jingmut ruh ha ka ban pynneh-pynsah ïa ka khyndew-ka shyiap bad ki marpoh khyndew, ban nym ai No Objection Certificate (NOC) ïa ka Sorkar Jylla ha kaba ïadei bad ka jingshim jaka, bad ban nym ai NOC ïa ka jingthmu wanrah projek lynti rel.
Ka seng ka la dawa ban pynkylla kyrteng noh ruh ha ka ktien Khasi ïa baroh ki jaka kiba hap hapoh ka jingpeit-jingkhmih jong ka Council, kum ka Khanapara, Bilpara, bad Gambalbari.
Haba kren sha ki lad pathai khubor hadien ba la dep ban ai ïa ka dorkhas, u General Secretary ka RWDO, u Bah Donlang L Nongbri u la ïathuh ba ka jingïakren bad u CEM ka long kaba sngewtynnad bad u la ong ba u CEM u la pynsngew ruh sha ka seng ba u don ka jingangnud ban weng ïa ki jingeh kiba la pynpaw da ka seng.
Shuh shuh, u CEM u la pynpaw ïa ka jingkwah jong u ban ïakren bad ka Sorkar Jylla bad ïa ki MP ban pynbeit ïa ki mat kiba ïadei bad ki ïew khappud, kiba long kum ki jaka kamai ba kongsan na ka bynta ki nongshong shnong ha ki jaka khappud.
Ka RWDO ka la kyntu ruh ïa ka KHADC ban pyrshah ïa kino-kino ki jingpyrshang jong ka Sorkar Jylla ne ki riew shimet ban shim ïa ki jaka kiba hap hapoh ka jingpeit jong ka Council, da kaba pynpaw ïa ka jingdonkam ban ïada ïa ki jaka na ka bynta ki trai ri trai muluk.
“Ngi la ban jur ïa u CEM ba un nym ai NOC ïa kino-kino ki kynhun treikam ne ka Sorkar Jylla kiba thmu ban thied da ki spah akar ïa ki jaka hapoh ka Ri Khasi, na ka liang ka seng ngi don ka jingsngewkhia halor kane ka bynta namar ka Ri Khasi jong ngi ka dei kaba rit bad kiba bun kiba shong shapoh ki thaiñ nongkyndong, ki shaniah ha ka kam rep-kam riang, kumta lada ka Sorkar ka thied noh ïa kine ki jaka kan long ka jingduhnong kaba khraw bah ïa ki nongshong-shnong jong ka Ri Khasi jong ngi”, ong u Bah Donlang.
Haba pynskhem biang ïa ka nongrim jong ka, ka seng ka la ban jur ïa ka jingdonkam ban plie biang ïa ki ïew khappud ban kyntiew ïa ka kamai kajih ki nongshong shnong bad ki la pynpaw biang ba dei ban ai kyrteng da ka ktien Khasi ïa ki jaka ha kylleng ki shnong kiba hap hapoh ka jingsynshar jong ka Council.
