Shillong, Ïaïong 07
Ka Juventus ka la duh noh ïa ka lad ban jam sha ka kyrdan ban ïoh rung sha ka Champions League na ka Serie A hadien ba la ïakhaid mar 1-1 kol bad ka Roma kaba don jingkyrmen ban rung sha ka thup ba saw.
Kane ka kynhun jong u Igor Tudor ka dangsah ha ka kyrdan ba san ban ïaryngkat mar 56 poiñ bad ka Bologna kaba don ha ka kyrdan kaba saw ha ka jingïakhun kaba jwat bha ban ïoh ïa ka jaka ha ka jingïakhun jong ki klob ba paw jong ka Europe.
U Eldor Shomurodov u la lah ban pynïoh poiñ ïa ka Roma saw minit hadien ba la bteng ïa ka kylla miet, katba u Manuel Locatelli u la thep kol nyngkong shwa ban kut ka jingïalehkai jong ka kylla step na ka bynta ka Juventus.
La wanrah ïa u Tudor ha u bnai ba la dep ban pynurlong ïa ka Juventus ha ka Champions League, hynrei ka jingïakhaid ha ka Sngi U Blei ka la wanrah ka jingeh kaba khraw ban ïoh rung ha ka thup kaba saw namar ka Inter Milan bad ka Napoli kin ïaknieh ïa ka nam lahduh jong ka league.
Ka Juve kam lah ban pynurlong ban ïoh rung sha ka Champions League, kat kum ka jingpaw ha ka jinghiran ha ka jinglut jingsep bad ka jingbei tyngka palat 200 million euro ($217 million) ban pynthymmai ïa ka kynhun ïalehkai na ka bynta u Thiago Motta, uba la shah weng shuwa ban shimti u Tudor.
Katei ka kynhun ba khlaiñ bor na Turin, kan kiew halor ka Bologna ha ka jingïapher kol lada ka kynhun jong u Vincenzo Italiano kan shah rem ha la ïing pyrshah ïa ka Napoli, namar ba ka Juve ka don kham shadien hapoh ha ka miej kheiñ poiñ namar ba ka la ïalehkai kham bun.
Hynrei tang hynriew poiñ ka pynïapher ïa ka Fiorentina ha ka kyrdan kaba phra bad ka Atalanta kaba don ha ka kyrdan kaba lai bad kaba lamkhmat tang da ar poiñ ïa ka Juve hadien ba ka la mad ïa ka jingshah rem kaba lai da 1-0 kol ha la ïing pyrshah ïa ka Lazio kaba don ha ka kyrdan kaba hynriew.
Ka Roma kaba duna lai poiñ hadien ïa ka Bologna ha ka kyrdan kaba hynñiew hadien ka jingïakhaid kaba la pynkut ïa ka jingjop kaba hynñiew ha ka league hynrei ka la pyni katto katne ki dak kiba ai mynsiem na ka bynta ka jingïa-khun kaba eh.
Ka kynhun ba la pynthymmai jong u Claudio Ranieri kan ïakhun pyrshah ïa ka Lazio ha kaba kut jong ka taïew, katba ka Atalanta kan pdiang sngewbha ïa ka Bologna ha kawei pat ka jingïalehkai kaba kongsan.
