Ha ka jingiohi jongnga ka rukom ai jait khein jait jongngi ki Khasi – pnar tang sha ka jait jong ka kmie ka pyntroin noh ïa ka jait u kpa. Balei nga ong kumta, namar ha ka jingshisha ki khun ki mih na u kpa ka jait ka dei ban ai sha u Kpa. Namar u symbai u long na u kpa, ym na ka kmie. Ka dur ka dar, wat ka snam, ka jing-long ruh ka bit bha sha ka Meikha ka liang u kpa ba ai symbai ym na ka kmie ba pun ba kha.
Hynrei yn leh kumno namar ngi ïa kheiñ kor ïa ka sopti phong nalor ym ia u symbai ba dei ka tynrai ka jait ka khong. Te ka don khyndiat ka jingbha namar nga iohi ba don bun kiba ai lang bad ia ka jait u kpa kum ka dak ban pynsah nam pateng la pateng na u symbai ba u la ai. Haba paw tang ka jait ka kmie ka pynpaw ba ka jait u kpa ka shu sepei noh ha ka longbriew manbriew pateng la pateng.
Hynrei ngim dei ban klet ïa ka jait jong u kpa ba ai ia u symbai lano lano ruh. Ngi long briew man briew dei na u symbai ba ai u kpa. Namarkata ka jingai jait tang sha ka kmie ka pyntroin ïa ka jingïadei shiïing shisem bad klet noh ïa ka jait u kpa uba long u sohpet u ksai ba paka. Kumta ka donkam ïa ngi ki khun Khasi Khasi khara ban ai lang ïa ka jait u kpa bad ka kmie kumba ki la don bun kiba leh kumta. Kane nga pynpaw bad pyni na ka bynta ban ïa bha lang kum ka longïing longsem kaba paka. Hooid ki don kiba ai tang ïa ka jait u kpa, hynrei kane ruh ka long kum ka jingleh shiliang ïa ka jait u kpa ne ka kmie ba pun ba kha. Ka bha ba ngin ïa ai lang ïa ka jait u kpa bad jong ka kmie kan wanrah jingbha ïa ka jingiing longsem. Ki khun ki dei ban burom ïa ka kmie bad u kpa ym ban burom tang ïa u kpa ne ka kmie ruh.
C. B. Iawphniaw
