Chandigarh, ïaïong:
Ka jingpynbthei bom kawang kti ba la jia ha ka ïing jong u nongïalam ka BJP, u Manoranjan Kalia, ha Jalandhar jong ka Punjab, ka dei kaba la thmu da u Zeeshan Akhtar, uba dei u paralok ba jan jong u Lawrence Bishnoi bad u snar uba la shah kynnoh ba shah thwet ha ka kam pynïap ïa u nongïalam ka NCP, u Baba Siddiqui, ong ki tyllong khubor na ki pulit ka Punjab. Ki tyllong khubor na ki pulit ki la ïathuh ruh ba ka ISI jong ka Pakistan ka la thmu ban pynthut ïa ka jingïatylli niam ha Punjab bad ba katei ka jinghiar thma pyrshah ïa u nongïalam ka BJP ka dei kaba la thmu sha shiliang khappud.
Ka jingbthei ha ïing jong u Kalia, uba long u Myntri ka Cabinet bad u heh nongïalam jong ka seng BJP ha ka jylla, ha ka step jong ka sngi Ba-ar ka la wanrah ïa ki jingjulor jong ka ïing bad kumjuh ki jingkhangïit jong ka ïingsah jong u bad kumjuh ïa ka kali, la ong ki pulit. Ym shym la don ba mynsaw ha kane ka jingjia, la ïathuh ki pulit.
Utei u nongïalam ka BJP u don haïing ha katei ka por.
Kane ka dei ka jingbthei bom kaba khatduh eh ha Punjab kaba la pynlong ïa ki seng ka liang pyrshah ban thombor ïa ka sorkar jong u Bhagwant Singh Mann. U Myntri jong ka Punjab, u Mohinder Bhagat, u la ong ba ki briew ki “bym lah ban pdiang ïa ka jingroi baroh jong ka jylla” ki don sha lyndet jong katei ka jingshah thombor.
Ka tyllong khubor na ki pulit ka la ïathuh ba ïa uba shah kynnoh uba la kawang bom kawang kti la shimti bad la kurup ruh ïa ka e-rickshaw kaba la pyndonkam ha katei ka kam thombor.
Kaba sngewtynnad ka long ba tang hadien katto katne por ba la jia ka jingbthei bom ha ïing jong utei u nongïalam ka BJP, u lehnoh Babbar Khalsa International u Happy Passia u la shim ïa ka jingkitkhlieh. Kane ka pyni ba ka kynhun runar Lawrence Bishnoi ka lah ban don ka jingïatrei lang bad ki kynhun lehnoh Khalistan bad ka ISI, kaei kaei kaba ki bor pahara ki la suba mynta la katto katne por.
Hapoh shisnem, ka Punjab ka la sakhi haduh 12 tylli ki jingbthei bad ka kyrteng jong u Happy Passia ka la paw ha ki jingtohkit halor kitei ki jingbthei. Ryngkat bad u, la suba ruh ba u Jeevan Fauji u donkti ha kitei ki kam thombor, ha kaba bun na kitei ki kam thombor, ki dei kiba thmu ban thombor ïa ki jaka treikam jong ki pulit ha Amritsar.
