Bengaluru, ïaïong:
Naba ka seng BJP ka dei ka liang pyrshah ka dang sdang ïa ka jingïakhih Janakrosha pyrshah ïa ka sorkar jylla ka Congress namar ka jingpynkiew dor ïa ki marbam bapher bapher, u Myntri Rangbah ka jylla Siddaramaiah u la ther ïa ka sorkar pdeng da kaba ong ba ka jingkiew dor ka dei ka jingmih beit na ki polisi kamai kajih jong ka kiba pyrshah paidbah.
“U Myntri Rangbahduh u Narendra Modi u la pynpaw pyrthei ïa ka jinglong arsap jong kaba la khot ka Janakrosha Yatre ba la pynlong da ki nongïalam ka BJP ha Karnataka da kaba pynkiew hi ïa ka dor jong ka Petrol, ka Diesel, bad ka lyer shet jingshet. U la ong, ha kaba ïadei bad kane, ban pynshisha, ki la ong ba baroh ha ryngkat kine k jingkiewdor ka la dei ka sakhi ba paw ba ka sorkar pdeng ka don ïa ki rukom pyntreikam ba pyrshah paidbah,” la ong u Myntri Rangbah ha ka rynsan X.
U Siddaramaiah u la ong ba u kwah ban tip aiu ki nongïalam ka BJP ha Karnataka ki don ban ong halor ka jingpynkiew thymmai ïa ka khajna ha ka umphniang Petrol bad Diesel da T.2 bad ka jingpynkiew dor T.50 ïa kawei ka tyndong Gas shet jingshet. Wat la ka dor jong ka umphniang bym pat pynkhuid ka hiar ha ka ïew ka hat jong ka pyrthei, hynrei ka srokar pdeng ka dang ïai bteng ban pynkiew dor ïa ka umphniang. Ki nongïalam ka BJP ki dei ban ai jingpynshai ïa ki paidbah ka Karnataka, la ong u Myntri Rangbah.
“Uno uno uba don ka jingtip ba sdang shaphang ka ïoh ka kot u sngewthuh ba ka jingkiew dor jong ka umphniang, ka Diesel, bad ka Gas shet jingshet ka dei ka daw tynrai jong ka jingkiew dor jong ki marbam bakongsan, naduh u khaw, ki symbai, dohkha, ka doh, bad ki jhur. Haduh mynta ki nongïalam jong ka BJP ki dang pyrshang ban kdew kti kylla pyrshah ïa ngi. Hynrei mynta, u Myntri Rangbahduh dalade u la pynpaw ïa ki buit sianti jong ki,” u la ong.
U Myntri Rangbah u la ong ba ki nongïalam ka BJP ki don tang ar tylli ki lad: ban pynbor ïa u Myntri Rangbahduh ban pynphai biang ïa ka jingkiew dor lane ban pynkut noh ïa ka jinglehkai jong ki bad ban leit phai noh sha la ïing. Lada ki jied ban bteng ïa kane ka drama, khlem pep kin ïakynduh ïa ka jingbitar ba shisha jong ki paidbah, la ong u Myntri Rangbah.
U Myntri Rangbah u la ong ba u President ka BJP jong ka jylla u BY Vijayendra u pyrshang ban ïada ïa ka kyrdan jong u ha ka seng jong u bad ka Janakrosha Campaign ka dei shi bynta na kata ka jingpyrshang bad kam shym la leh da kano kano ka jingmyntoi paidbah. U Myntri Rangbah u la kynnoh ba ki nongïalam ka BJP ka jylla ki la ïatehlok bad ka sorkar pdeng ban pynduh ïa ka bhah khajna kaba dei jong ka jylla.
Ha kajuh ka por, haba ïakren bad ki nongthoh khubor ha Koppal, u Myntri ka tnat Transport u Ramalinga Reddy u la ong ba ka sorkar jylla ka la pynkiew ïa ka khajna die Diesel hadien ba ka sorkar pdeng ka la pynkiew ïa ka dor Diesel. “Ha ka por ba u Dr Manmohan Singh u la iehnoh ïa ka shuki kum u Myntri Rangbah ha u snem 2014, shi litar ka Petrol ka shongdor T. 63 bad ka Diesel ka long T. 50. U Modi kum u Myntri Rangbah u la pynkiew dor ïa ka umphniang da bunsien. Lada ka sorkar kmie ka pynhiar dor ïa ka umphniang, ngi ruh ngin pynhiar dor ïa ka”, u la ong.
Halor ka jingthmu ban sangeh treikam jong ki trok ha ka 14 tarik. Ïaïong, u Reddy u la ong ba u la ïakren bad u President ka Lorry Owners Association u Shanmukhappa bad u la ïathuh ba kam dei ban don kano kano ka jingïakhih. U Reddy u la ong ba un sa shong jingïalang ruh kumjuh bad u Myntri Rangbah ka jylla.
