U Nongsaiñ Hima, 1965
Ka Jaidbynriew Khasi jong ngi ka la hiar nadong shadong naduh ka akor, ka ïaid ka ïeng bad ka kup ka sem.Kane ka jinghiar kan long tang na ka liang ki kynthei ne shynrang hynrei ka kynthup lang ïa baroh, kumta hangne ngi kwah ban kdew khyndiat.
Para ri baroh hana ngi phai sha ka ïaid ka ïeng ka kup ka sem, ka ktien ka thylliej jong ki rang bad ki thei samla Khasi hangne hapoh ri la jong ka long kaba la palat than bad kaba isih tam. Ki kynthei ruh kim long shuh kum kita ki kynthei kiba dei ban ri ïa ka akor ka burom bad ka long ïing longsem. Ki shynrang ruh ki la im mon palat kat haduh ba kim kheiñ shuh ïa ki kynthei khynnah.Ki bar jylla ruh haba ki iohi ba ki rang Khasi ki lehpoh bad khlem akor ïa ki kynthei kumta ki ruh ki sdang ban leh kumjuh. Kumta ngi kyrpang ïa ki paralok shynrang jong ngi ba kim dei shuh ban leh kumne khnang ba ki dkhar ruh kin nym ioh lad.
Ngi iohi shai kdar ba ki shynrang Khasi jong ngi ki la sngewpahuh kynthei than bad kumta kim salia shuh ïa kawei arngut kumta ki sdang pat sa ka leh beiñ leh sat.Hynrei phi dei ban kynmaw ba wat la ki kynthei ki long kiba shibor shibuit bad shirong ruh hynrei phi ki rangsamla phim dei ban beiñ ïa ki Namar ngi tip shai ba ki kynthei wei ki la lip ka rong kaba ki don shsien kata ka la long shi junom, ym kum ki rang khadar rong khadar lama. Phi kynmaw ne em ïa ka jingïathuh khana shaphang u Klew bad ka Sngi kumno ba u Klew u ïehnoh ïa ka sngi ha ka jingshah pynthame ha ki “Pertyrso” bad kumno pat ba u babe hadien. Kynmaw keiñ paralok ba wat leit ïa jied ïa jinglong u Klew sarong ki thei samla ki ri ruh ka long ka bym kai shuh bad dei na kane ka daw jong ki rang Khasi ba ki kynthei ki kylla riewkai bad kylla dakaid.
Bunsien haba ngi iohi ïa ka jingshah kynthoh jong ngi ki kynthei samla Khasi ba la palat shisha haduh ba ki la shuh thad palat ïa ka ïaid ka ieng jong ngi bad ka riam ka beit ruh kumjuh. ïa ki para shynrang pat ym don ba iohi namar ba imat ki la biang nadong shadong mo katba ngi ki kynthei pat kiba dap da ka jingduna suda hynrei ym don pat ki ban pynbeit ïa ka lynti ka jingbakla jong ngi.
Ngi te hangne ngim shym kwah ban kynthoh ïa ki shynrang ne kynthei hynrei ngi shem ba baroh lang kynthei bad shynrang ruh ki la im mon palat la i kum bym ju don ba sneng ba kraw ïa ki. Kumta lada phi ïa sngewieit shisha haduh katta katta ïa ka jaidbynriew lang baroh kawei, te sngewbha ban shu pyni da ki jingsneng bad pynbeit ruh ïa ki jingbakla jong ngi ki samla. Kumta ngi kyrpad ïa phi ki long kmie lang kpa ban ïarap lem ïa ngi ha ka ban pynkhie im pat ïa ka jaidbynriew jong ngi. Ha kaba khadduh eh ngi kyrpad ïa ki samla baroh ba kin nym sngewsih eiei ruh ïa kine ki jingthoh jong ngi. Kumta hangne ngi sneng khyndiat ïa ki para kynthei bad shynrang. Ko rang Khasi kynmaw bha ba shuwa ba phi mut ban lehbein lehsat ïa ki para kynthei phin sngewbha ban da pyrkhat bad ngam jylliew bhya. Ki thei samla ruh kin sngewbha ban ïai shah ia ki jingjynjar bad shuwa ba kin leh ïa ki kam sang, kam poh kin sngewbha ban da pyrkhat ïa kiba ha ïing ha sem bad ka jaidbynriew Khasi de. Namar kane kaei kaei baroh ka lam sha ka jinghiar bad jingpoh jong ka jaidbynriew jong ngi.
