New Delhi, ïaïong:
U Myntri Rangbahduh ka ri, u Narendra Modi, u la pdiang sngewbha ïa ki nongïoh khusnam na kylleng ka ri, ha ka ïing jong u, ha ka sngi Ba-ar, ban kynmaw burom ïa ka jingdap shisnem jong ka Pradhan Mantri Mudra Yojana (PMMY), kaba u la batai kum ka “jingkylla kaba sngap jar ha ka ïoh ka kot” kaba la ai bor ïa ki Million ngut ki nong India, khamtam kito kiba wan na ki shnong kiba duk.
U Modi u la ïasam ïa ki jingïohi jong u na ki jingïakren jong u bad ki nongïoh jingmyntoi, kiba bun na ki ki la pynkylla ïa ka jingim jong ki bad ki la kylla long ki nongthaw kam thaw jam, bad u la pynpaw ïa ka prokram kum ka nongpynïaid ïa ka lad bad ka burom. U Myntri Rangbahduh u la pynbna, “Ka ailad ïa ki briew ban im ïa ka jingim jong ki da ka burom,” da kaba bynrap ba ka prokram ka la kyntiew ïa ka jingïatylli ha ka imlang-sahlang bad ka jinglaitluid ha ka liang ka ïoh ka kot nalor ka jingïatylli ha ka liang ka pisa tyngka.
Ka Mudra Yojana ka la ai ram haduh palat T. 33 lak klur naduh ba la sdang ïa ka, kaba ai ïa u briew uba rit paid ïa ka jingkyrshan pisa kaba kongsan bad plie lad ïa ka kam bad ka jingseng kam seng jam. “Man la ka ram Mudra ka rah ryngkat bad ka ïa ka burom, ka jingburom ïalade bad ka kabu,” la pynksan u Modi ha ka jingthoh ha ka rynsan phah khubor ha X. Kawei na ki khana ai mynsiem ba la ïasam ka dei ka jong u Luv Kush Mehra na Bhopal, uba la sdang ïa ka jingïaid lynti jong u ha ka kam seng kam seng jam ha u snem 2021 da ka ram kaba T.5 lak hapoh ka aiñ Mudra. Ka ram jong u naduh kata ka por ka la kiew sha ka 9.5 lak, bad ka kam jong u mynta ka don ha ka lynti ban poi haduh 50 lak ha ka jingmih, kaba pyni kumno ki samla nongkyndong ki nang lah ban shaniah ha lade bad ban pynleit jingmut ha ka kam.
Ka jingïathuhkhana shaphang uwei u samla pule ha ka snem ba khatduh jong ka Bhavnagar, uba la pyndonkam ïa ka ram Mudra ban sdang ïa ka kam katba u dang pule ha ka kolej bad ban thaw kam thaw jam na ka bynta jong u bad kiwei pat, ka long kawei pat kaba sngewtynnad. U Modi u la pynksan ïa ka jinglong ba kynthup lang jong ka prokram da kaba kdew bajan shiteng na ki nongïoh jingmyntoi ki dei na ki jaitbynriew SC, ST, bad OBC, bad ba palat 70% na ki nongïoh jingmyntoi ki dei ki kynthei.
U la ban jur ba ki kynthei ki don ka bynta ba kongsan ha kaba kyntiew bad pynneh ïa ka jinglong ba shisha jong ka skhim. Ka sorkar jong ngi kan dang ïai trei ban thaw ïa ka Ecosystem kaba khlaiñ ha ki por ban wan khnang ba baroh kiba kwah ban long trai kam kin ïoh ïa ka ram, ka ban ai ïa ki ïa ka jingshaniah halade bad ka jinglah ban kiew kaba ki donkam,” u la ong. Katba ka PMMY ka dang rung ha ka snem kaba shiphew jong ka, ka pyni ym tang ïa ka jingpyrshang ha ka liang ka pisa tyngka hynrei ka dei ruh ka sienjam ban long trai kam hi ha ka por kaba biang.
Ha ka 8 tarik, Ïaïong, u Risaw, 2015 la pyntreikam ïa ka Pradhan Mantri Mudra Yojana (PMMY) da ka thong ban ai ram ïa ki kam rit kam ria bad ki kam rit kam ria khlem da siew bai pynskhem. Ka mang tyngka jong ka sorkar pdeng 2024-25 ka la pynkiew ïa ka ram kaba heh tam na ka 10 lak sha ka 20 lak, da kaba pynrung ïa ka kyrdan Tarun Plus kaba thymmai na ka bynta ki ram kiba palat ïa ka 10 lak bad haduh 20 lak. Ha u bnai Kyllalyngkot, 2025, ka tnad karkhana rit ka la tyrwa ban pynkiew ïa ka kyrdan Shishu sha ka 5 lak bad ïa ka kyrdan Kishor sha ka 10 lak kum ka jingpyrshang ban ïarap shuh shuh ïa ki trai kam rit.
Kine ki jingpynbha ki pyni ïa ka jingkut jingmut jong ka sorkar ban pynbun ïa ka jingai pisa na ka bynta ki kam rit kam ria.
