Imphal, ïaïong:
Ka Election Commission of India ka la sdang ïa ka jingpynkhreh na ka bynta ka ilekshon shiteng samoi ka ban sa wan ha ka 49-Tadubi (Scheduled Tribe) Assembly Kum shi bynta jong ka jingpynkhreh, la pynmih ïa ki dur jong ki nongthep vote ha ka 8 tarik, Ïaïong, 2025.
La pynlong ïa ka jingïalang ïamir jingmut ha ophis jong u Chief Electoral Officer, Manipur, ryngkat bad ki nongmihkhmat na ki seng saiñ pyrthei jong ka ri bad ki seng saiñ pyrthei jong ka jylla ban ïakren ïa ka rukom pynlong ilekshon bad ban pynthikna ïa ka jingïatreilang kaba ïaid beit ïaid ryntih.
Katkum ka Published Draft Roll, ka Tadubi konstitwensi mynta ka don 47,756 ngut ki nongthep vote kiba kynthup ïa 24,048 ngut ki shynrang bad 23,708 ngut ki kynthei. Ka konstitwensi kan don baroh 81 tylli ki jaka thep vote.
Ki nongshong shnong kin ïoh ïa ka lad ban ujor ïa ki jingdawa bad ki jingpyrshah ha kaba ïadei bad ka jingpynkhreh ïa ka thup kyrteng nongthep vote hapdeng ka 8 tarik, Ïaïong bad ka 2 tarik u Jymmang, ïa ka thup kyrteng jong ki nongthep vote ba khatduh la buh ban pynmih ha ka 5 tarik, Jymmang, 2025.
U Joint Chief Electoral Officer jong ka Jylla Manipur, u Ramananda Nongmeikapam, u la kyntu ïa baroh ki nongthep vote kiba dei hok ha ka Tadubi konstitwensi ba kin ïashim bynta shitrhem ha ka jingpynkylla ïa ka jingthoh ba kyrpang kaba dang ïaid shakhmat bad ban pynthikna ba ïa ki kyrteng jong ki yn pynrung ha ka thup ki nongthep vote.
Kane ka ilekshon shiteng samoi ka la long kaba donkam hadien ka jingkhlad noh jong u N Kayisii uba dei u MLA ba mynta na Tadubi Assembly Konstitwensi. U la khlad noh ha ka 17 tarik u Kyllalyngkot, 2025, hadien ka jingpang kaba la slem bha.
U Kayisii, dei ka dkhot jong ka National People’s Party (NPP), kaba la shah jied na katei ka konstitwensi, ha ka elekshon sha ka ïingdorbar thawaiñ kaba dang shu dep.
