Thiruvananthapuram:
Ka Kerala kan sa pynbna paidbah ba kan lait na ka jingduk tasam ha ka 1 tarik Naiwieng, la ong u Myntri Rangbah ka jylla u Pinarayi Vijayan ha kine ki khyndiat sngi ba la leit. Ïa kane ka jingpynbna la pynbna ha ka jingïalang ha Pinarayi Convention Centre, ha kaba u Myntri Rangbah u la jer kyrteng ruh ïa ka Dharmadam, ka konstitwensi kaba u mihkhmat kum ka konstitwensi kaba nyngkong eh ha kane ka jylla ban lait lut na ka jingduk tasam.
U Myntri Rangbah u la ong ba ka jylla ka la thmu ban pynurlong ïa kane ka thong lai snem mynshwa. “Ka Local Self-Government Department ka la don ka bynta kaba kongsan ha ka jingïalap paidbah, hynrei ïa ka jingjop la pynlong lyngba ka jingïatreilang kaba la pynïasoh lang ïa ki tnad sorkar kiba bun jait.
Ka jingdon jong ki briew kiba im ha ka jingduk kaba jur ha Kerala ka long tang hapoh 1%, bad ka sorkar ka la shim khia bha ïa kane ka sienjam naduh kaba sdang. La shna ïa ka Plan Micro-Level haman ki 64,002 tylli ki longïing kiba la ithuh ba ki long kiba duk palat, bad ka rukom treikam jong ka sorkar ka long kaba la pynshong nongrim ha ka jingsngewrit.
U Myntri ka tnad Registration u Kadannappally Ramachandran – uba la pynïaid ïa kane ka jingïalang – u la ïaroh ïa ka jinglong ba bniah jong ka jingïakhih, kaba la sdang ha u bnai Nailar jong u snem 2021. Ka sorkar ka la sdang ïa ka jingïalap paidbah ban ithuh ïa ki longïing ki bym lah ban pynbiang ïa ki jingdonkam ba kongsan kum ka bam, ka koit ka khiah, ka ïing ka sem kaba shngaiñ bad ka ïoh ka kot kaba neh bad ai jingkyrshan.
