Guwahati, ïaïong:
U Myntri Rangbah ka jylla, u Himanta Biswa Sarma, ha ka sngi U Blei, u la plie paidbah ïa ka jaka sumar jong ka jingpang bampong ne ka Cancer kaba nyngkong eh ha Northeast India, ha ka State Cancer Institute, kaba don hapoh ka Gauhati Medical College and Hospital (GMCH) ha Guwahati.
Ïa kane ka robot, kaba la shna hapoh ka jingthmu ‘Make in India’, la thied ha ka jinglut kaba T.14.99 klur hapoh ka National Program ban ïada bad tehlakam ïa ka jingpang Cancer, Diabetes, Cardiovascular Diseases bad Stroke (NPCDCS). Ïa kane ka jaka la pyndap da ka Endoscope kaba lah ban pynïadei, ka jingpynïaid ïa ka Camera kaba tbit, bad ki jingpynkhreh ba pura ban pynlah ïa ki jingsumar Cancer kiba rit eh bad kiba thikna bha.
Haba kren ha kane ka jingïalang, u Myntri Rangbah ka jylla u la ong ba kane ka jaka kan pynbha shibun ïa ka jingsumar ïa ka jingpang Cancer ha ka thaiñ da kaba pynduna ïa ka por ban leh Surgery, pynduna ïa ki jingeh, bad pynbha ïa ka jingkoit jingkhiah. U la pynbna ruh ba shen yn sa buh ïa kum kine ki Robot System ha Dibrugarh bad Silchar ban shakri ïa ki nongpang ha Upper Assam bad ha Barak Valley.
Ha kajuh ka sngi, u Sarma u la pynbna ba yn seng ïa ki kolej Nursing ha baroh ki jaka sumar ïa kiba pang Cancer ha ka jylla, ki ban ai jinghikai ryngkat bad ka jingïakynduh bad ka ktien phareng bad ktien Japan ban pynïar ïa ki lad kamai jong ki samla pule ha ka pyrthei.
U Myntri Rangbah ka jylla u la ai khublei ruh ïa ka jingkyrshan jong ka ICICI Foundation, ka Assam Cancer Care Foundation, ka State Cancer Institute, bad ka GMCH, bad ula kdew ruh ba ki lad ki lynti ki dang shim ban pyntbit ïa ki nongtrei ka koit ka khiah ha kaba pyntreikam ïa ka Advanced System.
Ha kane ka sngi la don lang u Myntri ka tnad Industries and Commerce u Bimal Bora, u Chief Executive Member ka Karbi Anglong Autonomous Council u Tuliram Ronghang, Secretary of Medical Education Siddharth Singh, GMCH Principal Dr Achyut Baishya bad kiwei kiwei ki riew pawkhmat.
