Imphal, Naiwieng:
Uwei u lehnoh uba dei na ka kynhun jong ka Kangleipak Communist Party (KCP) kaba la shah ñiew beaiñ u la shah pynïap ha ka jingïakynad bad ki bor pahara ha Manipur ha Imphal West distrik ha ka step jong ka sngi palei 20 tarik u Naiwieng, katba katto katne ngut kiwei pat ki la shah kem ha ka por ba pynlong ïa ka jingkhynra, ong ki heh pulit. Kane ka jingïasiat ka la jia ha ka thaiñ Yurembam, kaba hap hapoh ka jingpeit jong ki pulit ka Patsoi Police Station, ha ka por ba ki bor pahara ki dang pynlong ïa ka jingkhynra.
Katkum ka jingong jong ki heh sorkar, ki bor pahara ki la shah siat ha ka por ba pynlong ïa ka jingkhynra, kaba la pynmih ïa ka jingïasiat ha kaba uwei u lehnoh u la ïap. Hadien kata la kem sa katto katne ngut kiwei pat kiba la suba ba ki dei ki dkhot jong ka kynhun ba la khang pyrshah, la ong uwei pat u heh pulit.
Ki bor pahara ki la bteng ban wad bad wad bniah ha kylleng ki jaka ba rit paid jong ka Manipur hadien ka jingmih ka jingïakynad hapdeng ki jaitbynriew Meitei kiba sah ha ki them bad ki jaitbynriew Kuki kiba sah ha ki lum ha u bnai Jymmang 2023.
Ka jingïaleh ka la shim ïa ka jingim jong ym duna ïa ka 306 ngut, katba 49 ngut ki briew ki dang jah rngai. Da ki hajar ngut ki briew ruh ki la shah pynkynriah na la ki jong ki ïing ki sem naduh ba la sdang ka jingïakynad. Ki jingïakynad hapdeng ki kynhun Kuki bad ki kynhun Naga ha ki jaka lum jong ka jylla ki la shim ïa ka jingim jong ym duna ïa ka 50 ngut naduh u bnai Rymphang mynta u snem.