Chandigarh, ïaïong:
Ïa kane ka jingpynthikna la pynsngew sha ki nongmihkhmat jong ka PCMSA ha ka jingïalang kaba la long bad u Chief Secretary, ka Health and Family Welfare, u Kumar Rahul, u Director ka tnad ka koit ka khiah u Dr Hitinder Kaur, bad u Director ka Punjab Health Systems Corporation u Dr Anil Goyal, ong ka kyrwoh khubor jong ka PCMSA.
Ka Punjab Civil Medical Services Association (PCMSA) ha ka sngi Palei ka la ïathuh ba ka sorkar jylla ka la mynjur ha ka nongrim ban buh ïa ki nongap pahara ha baroh ki hospital ba la pynïaid da ka sorkar.
U President ka PCMSA, u Akhil Sarin, u la ong ba kane ka rai ka dei hadien ka jingïathir bniah hapdeng u Myntri ka koit ka khiah u Dr Balbir Singh, u Principal Secretary ka tnad ka koit ka khiah u Kumar Rahul, bad u Myntri ka tnat pla tyngka u Harpal Cheema.
Kane ka jingjia ka long hadien ba la mih ar tylli ki jingïakynad ha Dera Bassi (11 tarik, Ïaïong) bad Gurdaspur (12 tarik, Ïaïong) Civil Hospital.
La ïoh jingtip ba ka tnad pla tyngka (FD) ka la mynjur ïa kane ka jingtyrwa, ka ban ïohi ïa ki jingpahara ba baroh shisngi ha baroh ki Hospital jong ki distrik (DH), ki hospital barit (SDH), bad ki jaka sumar paidbah (CHC).
Katkum ka jingtyrwa, yn pynthikna ban buh ïa ki nongpahara jong ka PESCO ha baroh ki Hospital jong ki distrik, ki Sub-Divisional Hospital, bad ki jaka sumar paidbah ha kaba la ai ïa ka jingshakri jong ka Medico-legal Case (MLC).
Yn pynbeit ruh ïa ka jingpahara ha ka por mynstep ha ki CHC bad ki hospital kiba dang sah jong ki nongtrei, u la ong.
Ïa kane ka jingtyrwa la thmu ban phah sha ka FD ban ïoh ïa ka jingmynjur ba pura hapoh ki sngi ban wan bad ka lah ban long ba yn sa pynbeit hapoh ar ne lai taïew ban wan, la bynrap biang u Sarin.
