Guwahati, Ïaïong 20
Ka jingjia kaba sngew triem bad pynpar ‘ñiangkhriat, kaba la jia ha Chirang District kaba hap hapoh ka jylla Assam, ha kaba uwei u briew ba la 60 snem ka rta la kynnoh ba u la mait bad khrai ïa ka khlieh jong ka kurim bad hadien kata u la rah lang ha kti ïa ka khlieh ban leit pyndem ïa lade ha thanat.
Katkum ka khubor, la ong ba kane ka jingjia ka la jia ha ka janmiet jong ka Sngi Saitjaiñ ha Uttar Ballamguri, Bijni, ha kaba une u briew ba la tip kyrteng kum u Bitish Hajong, u la leh ïa kane ka kam kaba pynsuhjer ïa baroh hadien ba ka la mih ka jingïakynad hapdeng jong u bad ka kurim.
Ka khubor na ki pulit ka la ong ba la suba ba u Bitish u la pyndonkam da ki tiar kiba nep ban khrai ïa ka khlieh jong ka kurim bad ha kaba u la thep ha kawei ka byrni bad thep pat ha ka shang jong ka cycle.
U Bitish hadien ba u la pynïap ïa la ka kurim, u la khrai ïa ka khlieh bad hadien nangta ïa kane ka khlieh u la buh ha ka shang jong ka cycle ka jong u da kaba ïaid pyllun ban leit pyndem pat ïalade hakhmat ki pulit ka thanat Ballamguri.
Shuh shuh la ong ba katkum ka jingïathuh jong kiba sah marjan, kine ki shi kurim ki ju ïa kajia man ka por tang na ki daw barit bad ha kane ka sngi ruh ka la long kumjuh, kata hadien ba u Bitish u la wan phai na ka jingbylla.
Haba kren sha ki lad pathai khubor, ka Additional Superintendent of Police jong ka Chirang, ka Rashmirekha Sarma ka la pyntikna halor kane ka jingjia. “Ngi la shimti ïa ka metïap bad la phah ban leh ïa ka post-mortem. Ki Forensic Expert ki la leit ban peit sha ka jaka ba jia bad la lum ïa ki sabut. Ïa u Bitish la kem noh bad dang pynlong ïa ka jingtohkit,” ka la ong.
Shuh shuh ka Sarma ka la ong, ha kane ka por kin ym pat lah ban ong eiei halor kane ka jingjia kaba la lam sha kam ban pynïap.
