Shillong, Naiwieng 20
U Bah Martle N. Mukhim uba la long kum u MLA, MDC u ba la bat teng ruh ïa ka kam kum u Myntri Sorkar ha ki por ba la leit bad uba dei ruh u nongïalam ba shitrem ban pynlong kawei ïa ki seng saiñpyrthei riew-lum, u la pynpaw ïa ka jingsngewsih sngewdiaw haba ïadei ka jinglong jingman jong ka synshar khadar khamtam ki jingkylla kiba la jia ha ki seng riewlum.
Haba kren sha ki katto katne ki nongthoh khubor, u la pynpaw ka jingsngewkhia haba ïadei kiba la jia dang shen hapoh ka United Democratic Party (UDP) ha kaba ki phra ngut ki MLA jong ka ki la leit ban pynïasoh sha ka seng saiñpyrthei ba na ri thor ka Bharatiya Janata Party (BJP) bad ki lai ngut ki la leit noh sha ka National Peoples Party (NPP).
U la ong ba kane ka jingjia ba dang shen ka la pynkyndit ïa u bad pynpaw ruh ba um pat ju shem ba kum kane ka jinglong jingman ha ka saiñpyrthei kan kylla kynsan tang ha ki katto katne por. “Ka UDP ka la long kawei na ka seng riewlum kaba la khlaiñ eh hapoh ka Jylla bad ka long ruh ka seng kaba la ai jingshngaiñ ïa ki jaidbynriew riewlum lane ki trai ri trai jaka kiba don hapoh ka Jylla Meghalaya” u la ong.
“Haba nga ïohi ïa kane ka jingat phyllung jong ki nongmihkhmat jong ka UDP, kaba ki la ïehnoh ïa ka UDP bad ki phet noh sha kiwei pat ki party kiba dei ruh ki National Party, kumba ka long haduh mynta kata ka National Party kaba ki ong ka BJP ruh ka dei kaba ki briew ka Jylla jong ngi kim hun kim suk bad kim sngewdei ba kan don hapoh ka Jylla” la ong u Bah Mukhim.
U la ong ba kane ka jingbym sngewdei ki briew ïa ka BJP ka long namar ba ki rukom treikam jong ka ki long kiba pyrshah ïa ka rukom im, ka rukom ngeit jong ki briew kiba don hapoh ka Jylla Meghalaya, “Nga don ka jingsngewkhia kaba ngam sngewlah shuh ba ngan batai ban mutdur ka ktah ïa nga haduh katta-katta, namar nga naduh ba dangkha haduh kat mynta ngam pat ju leit sha ki National Party, ym dei ba nga isih ïa ki, hynrei nga pyrthuh bud ïalade katkum ka Riti Synshar ba donkam ban ïada kyrpang ïa kane ka ri ka jong ngi” u la ong.
Nalor kata shuh-shuh u la pynpaw ba lymda don ki briew kiba don kum kane ka jingïeit ïa la ka jong, ka jaidbynriew kan hap kan twa ha kiba bun ki bynta bad ka lah ban shah ïuhroit ha kiba bun kiwei pat ki jaidbynriew ba na ki ri jong ka pyrthei.
Haba pynpaw ïa ka jingsngewkhia kaba jur ïa ka jingdonkam ban pynkhlaiñ ïa ki seng saiñpyrthei riewlum, “Nga sngew ba ym don por shuh ban dang thiah dang shong ruh, kumno ban pynim bad ban pynkhlaiñ pat ïa ki seng riewlum na ka bynta ban ïada ban kyntiew ïa ki jaidbynriew trai ri kiba don ha ka Jylla, kata kaba mut ïa ki Khasi-Jaiñtia bad ki Garo” u la ong.
U la buh ka jingkyntu ïa ki briew kiba sngewdei ban don ha ka NPP, ka Congress, ka BJP ba ki dei ban don ka jingpyrkhat na ka bynta ka lashai ka lashisngi jong ki khun ki kti bad ïa ka pateng ka ban sa dang wan, ba ym ju dei ban ngam ha ki jingïoh, ka jingsngewbha, ka jingïoh ïa ka shuki lane ha kaba ïoh tang ha ka spah ka phew, hynrei ka la dei ka por ban pynshitom ïalade ba dei ban pynkhlaiñ ïa ki seng riewlum, “Ha ka jingshem ka jong nga dei tang ka seng trai ri kaba lah ba ïada ïa ka burom, ïa ka kyrteng, ïa ka akor bad nadong shadong jong ka ri bad ka jaidbynriew” u la ong.
U Bah Mukhim u la khot la wer ïa ki riew rangbah, ki longkmie ki longkpa ki khun samla ba ym dei ban shu shongshit, hynrei dei ban pyrkhat jylliew ïa ki jingma kiba ap hakhmat ïa ka jaidbynriew na kane ka jingleit pynïasoh kiba bun ki nongïalam seng riewlum sha ki National Party, “Ka jingkwah ka long ba ngim dei ban shah nguid, ngim dei ban hap ha ka jingpynïaid kiwei pat ki National Party, Ngi dei ban ïengskhem bad ngi dei ban pynkhlaiñ ïalade ïa ka jinglong trai ha kane ka Jylla da kaba ngi ïasnoh kti ha ki seng riewlum.
U la khot la wer bad kyntu jur ïa ki nongshong shnong ka Jylla haba ïadei ka jingdonkam ban pynkhie im ban pynkhlaiñ ïa ki seng riewlum ka Jylla, “Nga ïalade te ngam nang thiah nang dem wat haduh katne ka rta ruh, kumno ban pynkhlaiñ pat ïa ki seng trai ri ha ka Jylla baroh kawei, nga sngewkhia, ngam suk ka mynsiem ban ïap ha kane ka jingsahnud, kaba nga sngewkhia ka dei ïa phi, bad ki pateng ban sa wan ba kan jia aiu lada ngim don ka rukom pyrkhat kaba thymmai” u la ong.