Ludhiana, ïaïong:
Ki pulit ka Haibowal ki la pynngat ïa u wei u nongshong shnong jong ka Raju Colony halor ka jingkynnoh ba u la buh ïa ki dur ba u rah tiar ïaleh ha ki Social Network.
Ïa ka ejahar la mudui halor ka jingujor jong ka kurim jong u. Kane ka briew ka la kynnoh ruh ba une uba la shah kynnoh u la buh ïa ki dur ba la pynkylla dur jong ka ha ki lad pathai khubor ban pynjah burom ïa ka hadien ka jingïakajia ha ka liang ka shongkha-shongman.
Une uba shah kynnoh u dei uba la tip kyrteng kum u Mandeep Singh uba la sin kyrteng kum u Honey Rana uba shong ba sah ha Raju Colony kaba don ha Tibba Road.
Kane ka briew kaba la kdew ha ka jingujor jong ka kaba la mudui ha ka 22 tarik, Rymphang ba ka la ïashongkhlad hadien ka jingïakajia bad u kurim jong ka.
Ka mukotduma kaba ïadei bad ka jingïakajia ka dang sahkut ha ka ïingbishar. Kane ka longkmie ka la kynnoh ba u kurim jong ka u pyni dur da ki tiar ïaleh ha ki Social Network ban byrngem ïa ka.
Une u briew u la buh ruh ïa ki dur ba la pynkylla dur jong ka bad u la buh ruh ïa kajuh ha ki Social Network ryngkat ki kyntien pynjah burom.
U Inspector Gurnam Singh uba dang tohkit ïa kane ka kam u la ïathuh ba ïa kane ka jingujor ejahar la buh hadien ka jingtohkit.
Ïa une u nongshah kynnoh la pynngat ha ki kyndon 351 (2) jong ka BNS, kyndon 66-C jong ka Information Technology Act bad ka kyndon 25 bad 27 jong ka Arms Act.
Ka jingpynlong ïa ka jingleit thwet ka dang jur bha khnang ban ïohkem ïa u, la bynrap u heh pulit.
