Haba la jan man ka sngi ngi ju ïohi na kiba ha ïing ha sem ba ki pynbna bad lyngba ki lad pathai khubor ba ka don ka jingkhlad noh jong ki ‘riew rangbah kynthei ne shynrang ha ki shnong bapher baphner. Ki pynpaw ba uta ne kata ka briew ki la khlad noh na kane ka pyrthei. Shaei keiñ ngin leit. Ka jingkylli ka long ba ngi la leh pop kumta ngi ïa kynduh keiñ ïa kane ka jingïap. Namar ka jingïap ka long ka dak jong ka pop. Ngi ju ïohi ruh ba la khlad noh ki ‘riew rangbah ba paw jong ki shnong bad ki ‘riew khmat ha ki balang kum ki Pastor, ki Phadar bad ki Tymmen Basan kiba trei kam balang. Te haba kine ki dei kita kiba trei ïa ka kam u Blei la ñiew ruh ïa ki. Hynrei ki khlad noh na kane ka pyrthei, te shaei keiñ ki leit.
Namar baroh ki briew la uba duk ne uba ‘riewspah uba rit kyrdan ne uba heh kyrdan, U Syiem ne u nongkhrong kim don lynti ban leit sha bneng lait na ka jingïap, wat la ki ong ba ki la leit noh sha bneng sha ka khet u Blei. Namar ban ïoh leit sha bneng ka dei ka kamram jong u nongthaw nongpynlong ïa ngi ki briew bad ïa kiei kiei kiba don hangne ha sla pyrthei. Ban ïoh leit sha bneng kam dei ïa ngi ba ngin hap ïoh tiket liengsuiñ hynrei ngi dei ban ïoh tiket na u Blei ban ïoh leit sha kata kawei pat ka pyrthei kaba lum lang ïa kiba la ïap baroh. Dei tang u Blei uba lah ban ai ka jingsuk bad jingtngen ïa ngi ki briew katba ngi dang im ne hadien ba ngi la ïap ruh. U briew um lah ban kam kynti ba u la ïoh leit sha bneng khlem ka mon jong u nongthaw nongpynlong ïa ka pyrthei bad kumjuh ïa ngi ki briew.
C. B . Iawphniaw
