Hyderabad, ïaïong:
Ki heh nongïalam jong ka seng BJP kynthup ïa u Myntri ka sorkar pdeng uba dei khmih ïa ka tnat Dewïong bad ki par u G Kishan Reddy, ki la pynlong ïa ka jingïaid paidbah ha u mot jong u Ambedkar hajan ka Tank Bund ha ka sngi Balang ban pynrem jur ïa ka jingthombor jong ki lehnoh ïa ki nong-jngohkai pyrthei kiba shida ha Pahalgam kaba don ha Jammu & Kashmir bad pynpaw ïa ka jingïasnoh kti lang bad ki bahaïing bahasem jong kiba la khlad noh ha ka jingshah thombor.
Ki la pynmih ïa ki jingpyrta pyrshah ïa ka Pakistan bad ki kam lehnoh.
Ha kane ka jingïakhih la ïashim bynta da ki MP ka BJP u Konda Vishweshwar Reddy, u Eatala Rajender, u K Laxman bad kiwei kiwei ki riewpawkhmat.
Kham hadien ha ka por janmiet, u DK Aruna, u K Laxman bad kiwei kiwei ki nongïalam ka BJP ki la pynlong ïa ka jingïaid paidbah ha ryngkat ka jingrah ïa ki mombati ba meh naduh u mot jong u Dr BR Ambedkar, Necklace Road haduh People’s Plaza.
Kumba la sakhi, la ong ba ki kam jngohkai pyrthei ka la kiew bha ha ka por Lyiur ba la dep.
Ka jingkynthoh kaba jur tam jong ngi ka dei ban long ka jingïatylli kaba khlem artatien bad ki bor pahara jong ngi bad ka jingkyrshan kaba pura ïa u Myntri Rangbahduh u Narendra Modi ha ka thong jong u ban pynphai biang ïa ka jingsuk ha Kashmir bad ban pynthikna ïa ka lawei kaba khlem buh jingtieng jingsyier.
