Srinagar, ïaïong:
Shisngi hadien ka jingshah thombor ba shyrkhei ha Pahalgam ha Jammu & Kashmir, kaba la shim ïa ka jingim jong 26 ngut ki briew bad kaba la pynmynsaw ïa kiba bun, ki bor pahara ki la sdang ïa ka jingpyntreikam ban pynjur ïa ka jingpynshitom ïa kiba la donkti ha kane jingjia.
Katkum ki khubor ba la ïathuh, la ong ba ki don palat 250 ngut ki nongïarap jong ki kynhun pyntriem ne ki Overground Workers (OGWs) kiba don jingïadei bad ki kynhun lehnoh kiba la shah kem ha South Kashmir. Nalor kata, la kem haduh 1,200 ngut ki briew kiba la suba ba ki leh ïa ki kam lehnoh ha baroh kawei ka Kashmir.
Ka jingtreilang jong ki pulit ka Jammu & Kashmir bad kiwei kiwei ki tnad pahara ka la pynlong ïa kumba 1,450 ngut ban shah kem ban shah tohkit. Ki heh sorkar ki pynpaw ba kine ki jingleh ki thmu ban pynpra ïa ka kynhun pyntriem kaba don bynta na sha lyndet ha kaba ïadei bad ka kam thombor kaba shyrkhei kaba la jia ha Pahalgam. Ki OGW ki shah suba ba ki ai jingkyrshan ha ka liang ka jingpynbiang ne jingtip sha ki nongthombor.
Ki bor synshar ki ngeit ba ki jingtohkit kin ai ki jingshem kiba kongsan kumno la thmu bad pyndep ïa kum kane ka kam pynjot. Ïa ka jingpynshitom beiñ la ïohi ba ka long kaba donkam ban pynthut ïa ki jingtei kiba pynlah ïa kine ki jingshah thombor.
